Nis mbledhja e Komisionit të mandateve, Arben Ahmetaj nuk merr pjesë

Në Kuvend kanë mbërritur kreu i SPAK Altin Dumani dhe prokurorja Enkeleda Millonai. Po ashtu kanë ardhur dhe avokatët mbrojtës Saimir Visha dhe Enrik Ligori.

Për herë të parë, SPAK i ka kërkuar Kuvendit që kjo seancë të jetë me dyer të mbyllura, pasi në dosjen e konsideruar sekret përfshihen dhe emra të tjerë. Ndërkohë, mësohet se opozita do të kërkojë që kjo mbledhje të bëhet me dyer të hapura. Ndërsa avokatët nga ana tjetër, duan shtyrjen e mbledhjes, pasi kërkojnë më shumë kohë.

Skenari i parë, ku Arben Ahmetaj mund të hiqte dorë vullnetarisht nga mandati është rrëzuar, teksa ish-zëvendës/kryeministri nuk është paraqitur në Kuvend. Tashmë i mbetet Këshillit për Rregulloren, Mandatet dhe Imunitetin të marrë vendimin për mandatin e deputetit të Ahmetajt.

Prokuroria e Posaçme Kundër Korrupsionit, SPAK, i kërkoi Kuvendit një ditë më parë dhënien e autorizimit për arrestimin e ish-ministrit Arben Ahmetaj.

Shembulli më korruptiv dhe flagrant lidhet me gjurmët e mbetura në kompjuterin e Klodian Zotos, një i kërkuar dhe i akuzuar për inceneratorët i cili dyshohet se i pagoi udhëtime në disa shtete, atij dhe bashkëshortes. Pesë rastet e tjera të korrupsionit mbahen sekret nga SPAK pasi ka edhe persona të tjerë nën hetim.

Në letër-porositë e ndërkombëtarëve por edhe llogaritë bankare, SPAK thotë se nga udhëtimet, Arben Ahmetaj përfitoi 34 mijë euro.

Kjo ishte gjurma e parë që u bë shkak që SPAK ta veçonte Ahmetaj në atë kohë numri dy i qeverisë nga dosja 277 thënë ndryshe inceneratori i Elbasanit, duke e ndarë në fraksion më vete

Por Arben Ahmetaj dyshohet nga SPAK për veprime të dyshimta për të tre inceneratorët.

Akuza tjetër lidhet me fshehjen e pasurisë, dhe hetimi bazohet në sekuestrimin preventiv ndaj dy vilave, njëra në Palasë dhe tjetra në Hamallaj.