Srpska e do Ministrinë e Pushtetit Lokal për ta krijuar Asociacionin
Në mesin e kushteve që “Lista Srpska” ka për të hyrë në qeveri është edhe krijimi sa më i shpejtë i asociacionit të komunave me shumicë serbe.
Madje siç bëjnë të ditur burime të Radio Dukagjinit, kjo listë ia ka vënë syrin Ministrisë së Pushtetit Lokal, nga i cili dikaster do ta kontrolloj krijimin e Asociacionit të Komunave.
Besnik Osmani, sekretar i përhershëm në Ministrinë e Pushtetit Lokal, i ka thënë Radio Dukagjinit se kjo ministri nuk ka gjë në dorë për krijimin e asociacionit.
Ai vlerëson se ky asociacion do të ketë statutin dhe duhet të regjistrohet si OJQ në Ministrinë e Administratës Publike.
“Nuk mundem me u përgjigj për pretendimet që mundet me i pas një parti politike. Ministria e Pushtetit Lokal nuk ka përgjegjësi (për asociacionin). Asociacionet krijohen prej komunave me ligj dhe regjistrohen në Ministrinë e Administrates Publike. Duheni me thirr në MAP”, thekson Osmani.
Nga ana tjetër, Ministri në largim i Administratës Publike, Mahir Yağcılar thekson se ministria që ai drejton nuk ka të bëjë asgjë me asociacionin e komunave serbe, mirëpo nuk e përjashton mundësinë që në të ardhmen të ketë implikime.
“Nuk shoh implikim të ministrisë së administrues publike në krijimin e asociacionit”, potencon Yağcılar.
Edhe pse nuk është në përgjegjësitë momentale të Ministrisë së Pushtetit Lokal, Srpska si kusht për tu bërë pjesë e qeverisë së ardhshme ka edhe marrjen e përgjegjësive që deri më tash i ka ushtruar zvendëskryeministrja Edita Tahiri, njëherit kryenegociatore për implementim në dialogun e Brukselit, në mënyrë që të jenë autonom për të krijuar asociacionin.
Një ministri tjetër përmes së cilës “Srpska” dëshiron ta kontrolloj implementimin e marrëveshjes së Brukselit, përkatësisht pikës për asociacionin është ajo e Planifikimit Hapësinor.
