Starmer: Samiti Mbretëri e Bashkuar-BE do të mbahet më 22 korrik

Britania dhe Bashkimi Evropian do të mbajnë samitin e tyre të dytë më 22 korrik. Kështu njoftoi të martën kryeministri britanik, Keir Starmer ndërsa qeveria e tij kërkon të rivendosë lidhjet me bllokun dhe të shtyjë për bashkëpunim më të ngushtë në tregti, siguri dhe ekonomi.

“Qeveria ime laburiste po e përmbush premtimin tonë për të rivendosur marrëdhënien tonë dhe për ta vendosur Britaninë në zemër të Evropës”, ​​tha Starmer në një postim në X.

“Së bashku do të trajtojmë koston e jetesës, do të nxisim vendet e punës dhe do të krijojmë mundësi për të rinjtë’, shtoi ai.

Starmer, i cili po lufton për mbijetesën e tij politike përballë presionit nga brenda partisë së tij, i ka cilësuar marrëdhëniet më të ngushta me BE-në si një pjesë kyçe të përpjekjeve për të arritur rritje ekonomike dhe për të adresuar koston e jetesës.

Muajin e kaluar ai tha se dëshironte një “hap të madh” përpara në marrëdhënie në samitin e këtij viti, duke përshkruar angazhimin më të ngushtë me bllokun si një platformë për të ndërtuar në të ardhmen, duke përfshirë fusha të tilla si tregtia, mbrojtja dhe bashkëpunimi në siguri.

Qeveria e tij po kërkon gjithashtu përparim me BE-në në çështje që përfshijnë tarifat e çelikut, standardet ushqimore dhe energjinë.

Pas një takimi me Presidentin e Këshillit Evropian Antonio Costa të martën në një samit të G7 në Francë, një zëdhënës i zyrës së Starmer tha se të dy udhëheqësit kishin thënë se një marrëdhënie më e ngushtë ishte jetike për sigurinë, qëndrueshmërinë dhe prosperitetin evropian.