Dera e NATO-s është e hapur, anëtarësimi është i arritshëm. Për disa javë keni referendum për marrëveshjen e emrit. Ardhmëria juaj është në duart e juaja, derisa ne ju presim në NATO. Kjo është mundësi që paraqitet njëherë në jetë – të bëheni anëtare e bashkësisë ndërkombëtare me të gjitha përfitimet të cilat ajo i bart me vete.
Këtë e tha sekretari i përgjithshëm i NATO-s, Jens Stoltenberg dje në Shkup në një konferencë të përbashkët për mediat me kryeministrin Zoran Zaev.
Marrëveshja e Prespës e hap rrugën e Maqedonisë deri në anëtarësimin në NATO dhe BE, i shkroi presidenti amerikan Donald Tramp kolegut të tij nga Maqedonia Gjorge Ivanov, me rastin e Ditës së Pavarësisë – 8 Shtatori.
“Maqedonia ka shumë arsye sivjet të jetë krenare. Marrëveshja historike e Prespës e zgjidh kontestin shumëvjeçar të emrit me Greqinë dhe e hap rrugën e Maqedonisë për anëtarësim në NATO dhe BE. Marrëveshja dhe anëtarësimi i Maqedonisë në NATO do t’i përforcojë sigurinë, stabilitetin dhe prosperitetin në tërë rajonin. SHBA-ja është e gatshme ta mbështesë Maqedoninë, veçanërisht në bisedimet në vijim për anëtarësimin Tuaj në NATO. U dëshiron çdo të mirë qytetarëve të Maqedonisë në këtë ditë të veçantë”, ka shkruar Tramp në urimin, e publikuar dje nga Ambasada amerikane në Shkup.
Kryeministri Zaev në takimin me Stoltenberg, tha se NATO-ja dhe BE-ja janë përcaktim strategjik i Maqedonia dhe nga kjo nuk ka tërheqje dhe theksoi se është i bindur se referendumi do të jetë i suksesshëm dhe se do të arrihet censusi i nevojshëm.
“Siç po afrohet 30 shtatori, dita historike për Maqedoninë, gjithnjë e më shumë nuk kam arsye për të menduar ‘çka nëse’. Nuk ka çka nëse’. Unë jam i bindur se referendumi do të ketë sukses, sepse një shumicë e madhe do të votojë ‘pro’ dhe se censusi do të tejkalohet dukshëm dhe për këtë më nuk kam dilemë”, tha Zaev.
Edhe njëherë u bëri thirrje të gjithëve në Maqedoni të qëndrojnë së bashku për realizimin e interesave strategjike të vendit.
Njeriu i parë i Aleancës dje u takua me presidentin e Republikës së Maqedonisë Gjorge Ivanovin, me kryetarin e Kuvendit Talat Xhaferi, si edhe me ministren e Mbrojtjes, Radmilla Shekerinska dhe me liderin e VMRO-DPMNE-së Hristijan Mickoski.
