Sukses historik në karate, Anes Arifaj pjesë e kampionëve të botës
Përfaqësuesja e meshkujve e Malit të Zi në karate u shpall kampione e botës në garën ekipore në Hangzhou të Kinës, duke mposhtur Turqinë 3:2 në finale; pjesë e ekipit kampion është edhe Anes Arifaj nga Malësia.
Përfaqësuesja e meshkujve e Malit të Zi në karate ka arritur një sukses historik, duke u shpallur kampione e botës në garën ekipore në Kampionatin Botëror të zhvilluar në Hangzhou të Kinës. Siç njofton Tv Boin, në finalen e madhe karateistët malazezë triumfuan ndaj Turqisë me rezultatin 3:2.
Ky sukses ka rëndësi të veçantë edhe për Malësinë, pasi në përbërjen e ekipit kampion bën pjesë edhe Anes Arifaj, i cili vjen nga Malësia. Prania e tij mes kampionëve të botës sjell krenari të veçantë për vendlindjen dhe gjithë Malësinë.
Finalja ndaj Turqisë u vendos në përballjen e fundit. Fitore për Malin e Zi siguruan Nemanja Mikuliq dhe Vuk Vuçiniq, ndërsa pas barazimit 2:2, Mihailo Gojakoviq triumfoi në duelin vendimtar dhe i siguroi ekipit medaljen e artë.
Rruga drejt titullit kaloi përmes fitoreve në grup ndaj Algjerisë (3:2), Kinës (3:1) dhe Australisë (4:1), me një humbje nga Irani (0:5), pastaj fitores 3:1 ndaj Jordanisë në çerekfinale dhe 3:1 ndaj Rusisë në gjysmëfinale.
Titullin e kampionit të botës për Malin e Zi e fituan Anes Arifaj, Balsha Vojinoviq, Mihailo Gojakoviq, Lazar Jovoviq, Vuk Vuçiniq, Nikola Maloviq, Lazar Potpara dhe Nemanja Mikuliq — një nga arritjet më të mëdha në historinë e sportit malazez.



Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.