Sulmet ruse vrasin tre persona në Ukrainë, sulme godasin lagjet e Kievit

Të paktën tre persona u vranë të dielën nga sulmet ruse në Ukrainë, ndërsa dronët goditën disa lagje të kryeqytetit Kiev, siç njofton agjencia Reuters duke cituar zyrtarë vendorë.

Në qytetin verior të Sumyt, tre bomba të drejtuara goditën pranë një qendre mbështetëse për familjet, duke vrarë dy persona, shkroi në Telegram guvernatori rajonal Oleh Hryhorov. Rusia ka thënë prej kohësh se synon t’i kthejë zonat e rajonit të Sumyt në një “zonë tampon”.

Në Kharkiv, qytetin e dytë më të madh të Ukrainës në verilindje, një dron goditi një makinë dhe vrau shoferin, sipas prokurorëve.

Ndërkohë në Kiev, kryebashkiaku Vitali Klitschko tha se një dron goditi një ndërtesë banimi shumëkatëshe, duke shkaktuar zjarr në një periferi lindore të qytetit dhe plagosur një person. Zjarrfikësit arritën të shuanin flakët, tha ai. Dronë të tjerë goditën gjithashtu zona pranë një kopshti dhe një këndi lojërash në dy lagje, pa shkaktuar viktima, sipas Klitschkos.

Forcat ruse javët e fundit kanë nisur sulme pothuajse të pandërprera gjatë gjithë ditës, jo vetëm natën, siç kanë theksuar zyrtarët ukrainas. Të dyja palët mohojnë se shënjestrojnë civilë.