Sybiha: Ukraina do të shërojë ‘keqkuptimin diplomatik’ me Korenë e Jugut për dy robërit koreano-veriorë

Ministri i Jashtëm i Ukrainës Andrii Sybiha tha të enjten në mbrëmje se Kievi po punon për të shëruar atë që ai e quajti “keqkuptim diplomatik” me Korenë e Jugut, pas zbulimit publik nga presidenti Volodymyr Zelensky të transferimit të dy ushtarëve koreano-veriorë të kapur rob në luftën kundër Rusisë.

“Nuk do të doja ta quaja incident. Le të themi, është një keqkuptim diplomatik”, u tha Sybiha gazetarëve, siç njofton The Independent. “Shpresoj vërtet që kjo situatë të zgjidhet në të ardhmen shumë të afërt dhe ne po punojmë për këtë. Për ne, Koreja e Jugut është një vend i rëndësishëm. Dhe shpresoj vërtet në vrullin, vazhdimësinë dhe rezultatet konkrete që po arrijmë vërtet me ta.”

Reagimi i Sybihas vjen pasi presidenti koreano-jugor Lee Jae Myung kërcënoi të premten me “masa shtesë” ndaj Ukrainës, nëse Kievi nuk pranon ekzistencën e marrëveshjes konfidencialiteti për riatdhesimin e dy robërve dhe nuk kërkon falje publike. Në një postim në X, Lee shprehu “keqardhje të thellë” për përgjigjen e Ukrainës, duke akuzuar Kievin se po minon kreun e shtetit të Koresë së Jugut.

Zelensky kishte zbuluar javën e kaluar, gjatë adresimit në Asamblenë e Përgjithshme të OKB-së, se të dy robërit ishin dërguar në Korenë e Jugut — ndërsa Seuli priste që transferimi të mbetej sekret.

Dy koreano-veriorët ishin kapur në janar 2025 në rajonin e Kurskut, të parët e kapur të gjallë që nga hyrja e Pyongyang-ut në luftë në krah të Rusisë në 2024. Koreja e Veriut ka nënshkruar një marrëveshje partneriteti strategjik me Rusinë, përfshirë një pakt të ndërsjellë mbrojtjeje, dhe ka dërguar rreth 14,000 trupa për ta ndihmuar Moskën. Sipas Zelenskit, më shumë se 8,000 trupa koreano-veriore mbeten në Rusi, ndërsa 10,000 të tjerë po trajnohen për një dislokim të ardhshëm.