Sylvester Stallone rrëfen betejën me steroidet dhe buliminë: “U bëra i fiksuar pas trupit tim”

Aktori i njohur i Hollivudit, Sylvester Stallone, ka bërë një rrëfim të pazakontë për periudhën më të famshme të karrierës së tij, duke zbuluar se gjatë përgatitjeve për filmat “Rocky” dhe “Rambo” përdorte steroidë dhe kishte zhvilluar probleme serioze me ushqyerjen.

Në një intervistë për “The New York Times”, Stallone tregoi se në kulmin e famës së tij, gjatë viteve ’80, presioni për të ruajtur një fizik ekstrem ndikoi rëndë në marrëdhënien e tij me trupin.

“Pastaj u bë një obsesion”, tha 80-vjeçari, duke iu referuar përpjekjeve për të formësuar trupin sipas kërkesave të roleve të tij ikonike.

Stallone zbuloi gjithashtu se gjatë përgatitjeve për “Rocky III” kishte arritur në rreth 2.6% yndyrë trupore dhe se vuante nga bulimia.

“U bë shumë keq. Arriti deri aty sa u bëra bulimik. Po e dëgjoni për herë të parë këtu. Zbrita në 2.6% yndyrë trupore kur po bëja ‘Rocky III’ dhe nuk mund të mbaja asgjë në stomak. Ose nuk doja ta mbaja, sepse isha bërë kaq i fiksuar pas ruajtjes së atij niveli të formës fizike, saqë ishte kthyer në një lloj adhurimi obsesiv të trupit”, rrëfeu aktori.

Stallone tha se, sipas tij, në atë periudhë aktorët që synonin të ruanin një fizik ekstrem për periudha të gjata përballeshin me një presion të madh për të përdorur substanca për përmirësimin e performancës.

“Kur stërvitesh dhe përpiqesh të qëndrosh në formë për gjashtë muaj rresht, duke ngrënë kos dhe puding, kjo nuk funksionon”, tha ai.

I pyetur nëse kishte përdorur steroidë, Stallone tha se bënte cikle rreth gjashtëjavore, të cilat më pas i ndërpriste për gjashtë javë.

“Oh, Zoti im, patjetër që duhej. Por e bëje në mënyrë të kontrolluar – gjashtë javë përdorim, gjashtë javë pushim”, u shpreh ai, duke shtuar se përdorimi i tyre “i mori një taksë të tmerrshme” trupit të tij.

Një moment tjetër i rëndësishëm për Stallone erdhi me filmin “Cop Land” të vitit 1997, ku ai luajti rolin e sherifit Freddy Heflin, një personazh me probleme të dëgjimit dhe me një fizik dukshëm më pak të skulpturuar se ai që publiku ishte mësuar të shihte.

Sipas Stallone, ky rol e lejoi të çlirohej disi nga presioni për të pasur gjithmonë një trup perfekt. Ai e përshkroi atë periudhë si një moment ku u ndje “disi i çliruar”, edhe pse më pas, sipas tij, karriera mori një kthesë tjetër dhe ai “ra nga hiri i Hollivudit”.

Stallone mbetet një nga figurat më të njohura të kinemasë amerikane, me disa nominime për çmimin Oscar dhe një Golden Globe të fituar për punën e tij në serinë “Rocky”.

Në vitet e fundit, ai ka qenë më pak i pranishëm në filmat e mëdhenj aksion. Pas “Expendables 4” në vitin 2023, ai ka pasur role në filmat “Armor” (2024) dhe “Alarum” (2025), ndërsa një pjesë e suksesit të tij të fundit ka ardhur nga seriali “Tulsa King”, ku interpreton një bos mafioz.

Në vitin 2023 u publikua edhe dokumentari biografik “Sly”, i cili trajton jetën dhe karrierën e aktorit.