Tahiri: Policia sot është shumë më e përkushtuar

Ministri i Brendshëm, Saimir Tahiri bëri bilancin e vitit 2016 të Policisë së Shtetit, duke thënë se “viti i kaluar ishte një vit që, falë punës së palodhur, e nxori policinë nga rrënimi dhe degradimi profesional”.

“Policia sot është shumë më e përkushtuar. Besimi i publikut u rrit, fitorja jonë më e madhe është mentaliteti. Është rritur besimi dhe pritshmëria e publikut për zgjidhjen e problemeve nga policia”, tha ministri në një konferencë për shtyp.

Tahiri shtoi se “46.7 milionë euro pasuri dhe asete kriminale janë sekuestruar gjatë vitit 2016”, duke nënvizuar se “policia po forcon kapacitetin për të shkuar drejt peshqve të mëdhenj”.

Në lidhje me sfidat e policisë për vitin 2017, Tahiri tha se “dhuna në familje dhe armëmbajtja pa leje janë prioritetet madhore”.