Të dhënat/ Depozitat bankare, interesat në nivelin zero

Rënia e interesave në tregun bankar shqiptar është thelluar më shumë gjatë muajve të parë të këtij viti. Sipas të dhënave nga Banka e Shqipërisë, në muajin maj interesi mesatar i depozitave në lekë zbriti në minimumin e ri historik prej 0.8%.

Ndërkohë, depozitat në euro, prej më shumë se një viti po qëndrojnë në kufijtë e zeros dhe në tre muajt e fundit interesi mesatar i tyre ka qenë 0.2%. Madje, banka të veçanta, nuk pranojnë depozita të reja me afat në euro, por vetëm llogari rrjedhëse me komision mujor mirëmbajtje, çka bën që efektivisht norma e interesit të jetë negative.

Interesat e ulëta të depozitave janë rrjedhojë e politikave monetare nxitëse, por edhe e gjendjes shumë likuide të tregut financiar, për shkak të dobësisë së kreditimit dhe mungesës së alternativave të tjera të investimit financiar. Në rastin e euros, trysnia është më e lartë për shkak të interesave negative mbi depozitat që aplikon Banka Qendrore Europiane dhe Banka e Shqipërisë.

Normat e ulëta të interesit e kanë ulur në minimum interesin për të kursyer, çka e përmbush qëllimin e politikës monetare. Njëkohësisht, ulja e interesit të depozitave ka ndihmuar edhe në uljen e çmimit të kredisë, që gjithashtu ndodhet në nivelet më të ulët historikë. Për lekun, interesi mesatar i kredive të reja ka zbritur në 7.3%, ndërsa për euron në 4.2%.

Kjo nuk ka rezultuar e mjaftueshme për t’i dhënë shtysë rritjes sasiore të kredisë për ekonominë, megjithatë është fakt se bizneset dhe individët sot mund të sigurojnë financim më lirë se kurrë më parë. Kjo e ka bërë mjaft tërheqëse kredinë, sidomos në segmentin e konsumatore, që paraqitet në rritje të ndjeshme.