Të paktën 1 i vdekur dhe 131 të shpëtuar nga trageti italian në flakë

Sipas informacionit më të fundit ka një viktimë që është rekuperuar në bord të “Norman Atlantic”, sipas komandantit Giovanni Pettorino, kryetar i repartit operativ të rojes bregdetare.

Ky njeri ka vdekur gjatë përpjekjeve për të braktisur anijen duke u hedhur në det. Trupi aktualisht gjendet në bordin e një skafi të rojes bregdetare dhe po dërgohet për në Brindizi.

Rreth 131 persona që ishin në bord të “Norman Atlantic” janë të sigrut. Për momentin evakuacioni i pasagjerëve dhe i anëtarëve të ekuipazhit po bëhet vetëm me helikopterë, pasi moti i keqë dhe flakët nuk i lejojnë skafet t’i afrohen tragetit.

Në bord të anijes kishte 478 persona dhe zjarri është izoluar në urën numër pesë të tragetit, ndonëse flakët vazhdojnë të duken edhe në distancë dhe anija ka filluar të përmbyset.

Sipas medias italiane në vendgjarje ka arritur edhe anija e parë ushtarake e marinës italiane dhe forcat e shpëtimit shprehen se për momentin nuk ka probleme në shpëtimin e personave që kanë mbetur në traget./