Të rinjtë e PD-së thirrje qytetarëve: Të bashkohemi në protestë çdo ditë për familjen dhe kombin

Të rinjtë e Partisë Demokratike kanë bërë me dije se t’i bashkohen protestës së përditshme para Kryeministrisë, duke theksuar se vendi po përballet me sfida të mëdha që prekin çdo qytetar, pavarësisht bindjeve politike.

Në ditën e 11-të të protestës, përfaqësues të forumit rinor demokrat deklaruan se situata në vend kërkon bashkim dhe angazhim qytetar, duke kërkuar dorëheqjen e kryeministrit Edi Rama dhe qeverisë së tij.

Gjatë një deklarate për mediat, Nikola Kedhi u shpreh se Shqipëria ndodhet në një moment kritik dhe se problemet në arsim, shëndetësi, ekonomi, mjedis dhe siguri prekin të gjithë qytetarët pa dallim.

“Ne kemi sot një thirrje për çdo qytetar shqiptar, për çdo demokrat, çdo të ri, të djathtë apo të majtë, të angazhuar apo të paangazhuar, që të jetë në shesh sot dhe çdo ditë për të ngritur zërin dhe për ta kthyer Shqipërinë në shtëpinë tonë sërish”, tha ai.

Nga ana tjetër, Andia Ulliri ftoi qytetarët të marrin pjesë në protestë në emër të familjes, kombit dhe të rinjve që po largohen nga Shqipëria.

“Le të dalim në shesh me vendosmëri dhe dashuri për familjen, kombin dhe të rinjtë shqiptarë që largohen dita-ditës. Për të gjitha kauzat që na bashkojnë dhe jo ato që na ndajnë”, u shpreh Ulliri.