Të shtëna me armë në kafene në Agios Panteleimonas të Athinës, plagatet një vajzë 10-vjeçare

Të shtëna me armë u regjistruan pak pas mesnatës së të premtes në lagjen Agios Panteleimonas të Athinës, kur katër persona të panjohur që ndodheshin në një automjet në lëvizje hapën zjarr drejt një kafeneje në rrugën Agorakritou. Si pasojë e të shtënave u plagos një vajzë 10-vjeçare me origjinë shqiptare, e cila ndodhej brenda në lokal në momentin e sulmit.

Sipas informacioneve të para, ngjarja ka ndodhur rreth orës 23:50, në rrugën Agorakritou 32, ku persona të panjohur që lëviznin me makinë kaluan para kafenesë “Amora” dhe qëlluan drejt fasadës së saj. Vajza, bija e pronarit të kafenesë, u plagos në këmbën e majtë, në zonën e pulpit, dhe u dërgua menjëherë në Spitalin e Fëmijëve nga nëna e saj.

Në automjet ndodheshin katër persona, të cilët qëlluan nga brendësia e makinës para se të largoheshin nga vendi i ngjarjes. Në momentin e sulmit brenda kafenesë ndodheshin 10 klientë, të gjithë të huaj. Automjeti i përdorur në sulm, sipas informacioneve, u gjet i djegur pak kohë më vonë në zonën e Aspropyrgosit.

Ende nuk është sqaruar nëse fëmija është plagosur nga një plumb apo nga një fragment, ndërsa po shqyrtohen të gjitha provat për identifikimin e autorëve dhe zbardhjen e motiveve të sulmit. Sipas informacioneve të deritanishme, jeta e vajzës nuk është në rrezik. Policia greke ka nisur hetimet për zbardhjen e rastit.

Burimi: ProtoThema