Tensionohet situata me emigrantët, 5 të plagosur
Në kufirin jugor të Maqedonisë me Greqinë ka eskaluar situata pasi që policia është përleshur me emigrantët në tentimin për të mos lejuar hyrjen e tyre në territorin e Maqedonisë.
Policia maqedonase përdori gaz lotësjellës dhe shok-bomba për të shpërndarë emigrantët nga Lindja e Mesme, të cilët po tentonin të hynin në territorin e vendit, për të vazhduar më pas në Serbi dhe në vendet e BE-së.
Në këto përleshje me policinë janë plagosur 5 emigrantë.
Policia po vazhdon masat e rrepta të kontrollit të kufirit dhe se ajo është përforcuar me njësitet speciale ushtarake dhe mjetet e blinduara dhe motorizuara për të blinduar kufirin. Mbi tre mijë emigrantë kanë kaluar natën në qiell të hapur, duke tentuar për të hyrë në territorin e vendit.
Emigrantët janë ankuar për dhunë dhe terror të ushtruar nga ana e policisë maqedonase. Ndërkohë, një polic mbrëmë përfundoi i plagosur me thikë nga ana e një emigranti, transmeton Almakos.
Maqedonia u shëndërrua në rrugë kryesore tranzitore për emigrantët e huaj, ku mbi 40 mijë emigrantë sirian kanë kaluar nëpër rrugët e saj vetëm gjatë muajve të fundit.
