Tërmeti me magnitudë 5.7 trondit ishullin e Kretës në Greqi

Mëngjesin e 24 prillit, një tërmet me magnitudë 5.7 sipas shkallës Rihter goditi ishullin e Kretës në Greqi, duke shkaktuar shqetësim te banorët, por pa raportime për dëme materiale deri tani.

Sipas Institutit Gjeodinamik, tërmeti ndodhi në orën 06:18 me epiqendrën në zonë detare, rreth 23 kilometra jug-jugperëndim të Goudouras në rajonin e Lassithi, me një thellësi prej 9.7 kilometrash. Lëkundjet sizmike u ndjenë pothuajse në të gjithë ishullin.

Autoritetet lokale njoftuan se, ndonëse lëkundjet ishin të forta dhe zgjatën disa sekonda, nuk janë evidentuar dëme materiale. Kryetari i bashkisë së Sitia, Giorgos Zervakis, deklaroi se tërmeti shkaktoi shqetësim te qytetarët, ndërsa paslëkundjet vazhdojnë të ndihen.

Kryetari i bashkisë së Ierapetra, Manolis Fragoulis, u bëri thirrje banorëve të ruajnë qetësinë, duke theksuar se situata monitorohet vazhdimisht nga institucionet përkatëse.

Nënkryetari i qarkut Lassithi, Yiannis Androulakis, deklaroi për ERT se lëkundjet ndjeheshin në të gjithë pjesën lindore të ishullit, nga Sitia deri në Heraklion. Ai shtoi se mbrojtja civile është në gatishmëri dhe po vlerësohen pasojat e mundshme, sidomos në zonat me ndërtesa më të vjetra.

Pas tërmetit kryesor, në të njëjtën zonë janë regjistruar të paktën pesë paslëkundje të tjera me magnitudë nga 3.5 deri në 3.8, duke mbajtur në vigjilencë autoritetet dhe banorët.