Tirana e hoqi si të tepërt: “i papuni” Orges Shehi shpallet “Trajneri i vitit 2023”

Për të dytin vit radhazi, Orges Shehi është shpallur fitues i çmimit “Trajneri i vitit”. Tekniku 46 vjecar, pasi zhvilloi një tjetër sezon të suksesshëm duke u shpallur nënkampion, u shkarkua nga ish-skuadra e tij KF Tirana pas dy humbjeve në fillim të këtij sezoni. Tirana e largoi kur ishte në vendin e tretë, duke e zëvendësuar me Ahmataj, tani Shehi shpallet më i miri kur është ende i papunë. Të nominuar për të fituar këtë çmim ishin edhe trajneri i Egnatia, Edlir Tetova si edhe trajneri i Laçit, Mirel Josa.

Në Mbrëmjen Gala që po mbahet sonte në Teatrin Kombëtar të Operas dhe Baletit, ish-trajnerët e ekipit Kombëtar, Gianni De Biasi dhe Edoardo Reja i dorëzuan trofeun e rëndësishëm, Orges Shehit, i cili u shpreh i lumtur që është vlerësuar me këtë çmim për të dytin vit radhazi.

“Ndihem shumë i nderuar, sepse jam këtu mes dy personaliteteve dhe figurave të mëdha të futbollit tonë dhe futbollit europian. Si Reja dhe De Biasi, i cili ka qenë një indicie e madhe që t’i futem trajningut. Ndihem krenar që vij këtu për herë të dytë radhazi. Jam shumë i kënaqur. Dua të falënderoj gjithë trajnerët dhe kapitenët që më kanë votuar, si dhe ish-klubin tim, Tiranën” – tha Orges Shehi.