Tiranë, grabitet me armë zjarri taksisti
Instalimi i kamerave të sigurisë tashmë duket se është kthyer në një armë të fortë në duart e policisë për identifikimin e autorëve të krimeve të ndryshme.
Rasti më i fundit është ai i një taksisti në Tiranë, i cili ka rënë pre’ e një grabitjeje. Fatmirësisht, ai kishte të instaluar në makinën e tij një kamera sigure, e cila ka filmuar të gjithë momentin e ngjarjes dhe fytyrën e autorit.
Nga ana e saj, Policia e Tiranës ka kërkuar ndihmën e qytetarëve për identifikimin e tij, duke vënë dhe një shpërblim prej 200 000 lekësh. Kushdo që ka informacion mund të telefonojë në numrin 0694105735.
Në pamjet filmike shikohet grabitësi që nga sedilja e pasme kërcënon me armë shoferin dhe i kërkon atij xhiron ditore. Taksisti ia jep pa e zgjatur, por kur grabitësi i kërkon edhe unazën taksisti zbret nga makina e tij dhe i kërkon kalimtarëve të rastit të njoftojnë policinë.
