Tragjedi në familjen shqiptare në Greqi, 53-vjeçari vret bashkëshorten dhe tenton t’i japë fund jetës

Një tjetër ngjarje e rëndë është shënuar në Greqi, ku një burrë në Rodopi ka goditur me thikë dhe ka vrarë bashkëshorten e tij dhe më pas ka tentuar t’i japë fund jetës duke pirë naftë.

Sipas informacioneve paraprake, bëhet fjalë për një çift me origjinë nga Shqipëria, me tre fëmijë, dy prej të cilëve janë të rritur dhe një i mitur, 16 vjeç. Njëri prej fëmijëve të çiftit ka njoftuar autoritetet, pasi krimi ka ndodhur brenda shtëpisë ku familja banonte, në vendbanimin Dialambi.

Pas vrasjes së gruas 44-vjeçare, 53-vjeçari ka pirë naftë në përpjekje për të kryer vetëvrasje. Ai është transportuar në spital, ku ndodhet i shtruar.

Nga vendi i ngjarjes, policia ka sekuestruar dy thika, të cilat do të ekzaminohen në kuadër të hetimit.

Sipas të njëjtave informacione, në vitin 2022 ishte regjistruar një incident mes çiftit në Heraklion të Kretës. Në atë kohë, gruaja kishte bërë kallëzim ndaj bashkëshortit të saj për kërcënim.

Burri ishte arrestuar për këtë çështje dhe ishte dërguar përpara prokurorit kompetent.