Tragjedi në Greqi, shembet ndërtesa gjatë shuarjes së zjarrit, humbin jetën dy zjarrfikës, një tjetër i plagosur

Dy zjarrfikës humbën jetën mesditën e kësaj të shtune në Zefyr të Atikës, në Greqi, pasi një pjesë e një ndërtese të braktisur ku kishte rënë zjarr u shemb papritur gjatë ndërhyrjes për shuarjen e flakëve. Ngjarja e rëndë ka tronditur komunitetin vendas dhe ka vënë në pikëpyetje kushtet e sigurisë gjatë operacioneve të shuarjes së zjarreve në ndërtesa të vjetra e të braktisura.

Sipas Shqiptarja.com, zjarri shpërtheu në një objekt të braktisur në rrugën Katsantoni. Efektivët e zjarrfikëses ndodheshin brenda ndërtesës dhe po punonin për shuarjen e flakëve kur një pjesë e saj u shemb papritur, duke i zënë poshtë ata që ndodheshin në brendësi.

Dy zjarrfikësit, 23 dhe 44 vjeç, u nxorën pa jetë nga ndërtesa, pavarësisht përpjekjeve për t’i shpëtuar. Një efektiv i tretë, i cili fillimisht rezultonte i zhdukur dhe po kërkohej nga kolegët, u gjet i plagosur.

Alarmi në Qendrën Operacionale të Shërbimit Zjarrfikës u dha rreth orës 11:40. Në vendngjarje u dërguan 20 zjarrfikës me gjashtë automjete nga disa stacione të Athinës, si dhe forca të Njësisë Speciale të Menaxhimit të Fatkeqësive (EMAK). Në vendngjarje mbërritën gjithashtu dy njësi mjekësore të lëvizshme dhe dy ambulanca të EKAB-it.

Autoritetet po hetojnë nëse zjarrfikësit humbën jetën nga asfiksia, për shkak të tymit dhe kushteve brenda ndërtesës, apo si pasojë e shembjes së materialeve ndërtimore. Ekipi i Hetimit të Krimeve të Zjarrvënies është angazhuar për të përcaktuar shkaqet e zjarrit dhe rrethanat e sakta të ngjarjes.