Transporti urban/ Grevë për rritjen e çmimit të biletës

Transporti urban në kryeqytet,  ditën e sotme nuk ka ofruar shërbimin për qytetarët nga ora 05:00-08:00.

Shoqata e transportit është distancuar duke thënë se iniciuese është sindikata e punonjësve të transportit pasi ata nuk kanë marrë pagat e tre muajve të fundit.

Në lidhje me grevën e ditës së sotme, lëvizja për “Transport të lirë e cilësor”, ka bërë një njoftim ku i bën thirrje qytetarëve që të mbajnë qëndrim në lidhje me rritjen e çmimit të biletës.

“Transporti publik nuk u përket kompanive private. Pronarët dhe shteti janë marrë vesh. Pronarët bëjnë sikur duan të rrisin çmimin e biletës në 70 lekë ndërsa shteti sikur ia ul pretendimin. Qytetarët të reagojnë”, nënvizohet në njoftimin.
Sipas tyre, shoferët dhe fatorinot e autobuzave janë kërcënuar me heqjen nga puna nga pronarët e tyre dhe janë detyruar të bëjnë grevë për rritjen e çmimit të biletës”.

Ndërkaq, pritet që ditën e nesërme transporti urban të bëjë grevë tërë ditën. Caktimi i çmimit të biletës është një detyrim që  qeveria ia kaloi vendorëve dy muaj më parë.