“U lëshuan me molotovë e baltë dhe humbën”, Rama për miratimin e IBAR: Ditë krenarie! Opozita u gënjye dhe g�

Kryeministri Edi Rama ka reaguar sot në 22 maj në lidhje me negociatat e Shqipërisë me Bashkimin Europian.

Kreu i qeverisë thumbon opozitën, duke thënë se u lëshua rrugëve me molotovë, për ta djegur Shqipërinë në sytë e të huajve, por se nuk ia dolën. “Humbën si gjithnjë dhe Shqipëria fitoi”, shkruan Rama.

I pari i qeverisë shprehet se ndryshe nga se propagandon opozita, Shqipëria europiane po ndërtohet.

“Ndryshe nga se përflitet ditë e natë nga ata që në fund humbasin, Shqipëria europiane po ndërtohet”, nënvizon Rama.

Në fund, kryeministri deklaron se këto janë ditë krenarie për vendin tonë. Ai falënderon për arritjet e Shqipërisë qeverinë, institucionet e pavarura, si dhe përfaqësuesit e vendit tonë në tryezën e negociatave për Shqipërinë 2030 në BE.

Postimi i plotë i kryeministrit Edi Rama

Thanë negociatat u bllokuan. Thanë Shqipëria u ndëshkua. Thanë Europa u zgjua dhe narkoregjimi u zbulua.

U lëshuan rrugëve me molotovë, për ta djegur Shqipërinë në sytë e të huajve. U lëshuan nëpër Europë me thasë balte e llumi, për ta zhgarravitur Shqipërinë në sytë e të huajve. U gënjyen si gjithnjë nga mendja e tyre dhe gënjyen edhe ata gjithnjë e më të paktë, që shkojnë me atë mendje.

Humbën përsëri. Dhe Shqipëria përsëri fitoi

Më 26 maj në Bruksel, Konferenca Ndërqeveritare Shqipëri – BE vulos me sukses fazën hyrëse dhe çel fazën përmbyllëse të negociatave të anëtarësimit. Sepse ndryshe nga si e përflasin ditë e natë ata që gjithnjë humbasin në fund, Shqipëria Europiane që po ndërtojmë është një histori suksesi, e cila shkruhet me vizion, punë e përkushtim, hap pas hapi, e në fund gjithnjë fiton

Kjo është një tjetër ditë krenarie për Shqipërinë, për skuadrën tonë të madhe, për të gjitha repartet e saj në çdo pjesë të fushës së përgjegjësive publike, për shumicën parlamentare, për qeverinë, për institucionet e pavarura, e sigurisht për ata që i përfaqësojnë ato në tryezën e negociatave për Shqipërinë 2030 në BE

Urime të gjithëve e mbi të gjitha faleminderit çdo shqiptari e shqiptareje, që na beson e na mbështet në rrugën e këtij misioni historik

Forca Shqipëria