Uashingtoni dhe Seuli studiojnë mundësinë e reagimit ushtarak pas testimit koreano-verior

Shefat ushtarakë amerikanë dhe koreano-jugorë kanë diskutuar për mundësinë e reagimit ushtarak pas lëshimit të një rakete balistike ndërkontinentale nga Koreja e Veriut, theksoi sot Pentagoni.

Gjenerali, Joe Dunford, shefi i Shtabit të Përgjithshëm të ushtrisë dhe admirali Harry Harris, shef i komandës së Paqësorit të marinës amerikane, zhvilluan një bisedë telefonike me shefin e Shtabit të Përgjithshëm të Koresë së Jugut, gjeneralin Lee Sun Jin.

“Gjatë kësaj bisede, Dunford dhe Harris shprehën angazhimin e parevokueshëm ndaj aleancës amerikano-koreano-jugore”, theksoi komandant Greg Hicks, zëdhënës i gjenealit Joe Dunford, në një komunikatë.

Ai theksoi se tre zyrtarët kishin përmendur mundësinë e reagimit ushtarak.

Pentagoni po përgatit që prej shumë kohësh mundësinë e një konflikti me Korenë e Veriut, po gjuha e vendosur e kësaj komunikate shënon një zhvillim në raport me reagimet publike pas testimeve të raketave.

Më parë, behej fjalë për kritika ndaj testimit të raketave pa përmendur mundësi ushtarake si kundërpërgjigje.

Ministri i Mbrojtjes, aktualisht me pushime, e kishte cilësuar testimin e parë të raketës balistike ndërkontinentale (ICBM) më 4 korrik nga Pheniani si provokim duke këmbëngulur në faktin që SHBA-ja vazhdon të kërkojë një zgjidhje diplomatike.

Zëdhënësi i Pentagonit, kapiteni Jeff Davis deklaroi dje se do të jemi të gatshëm të vetëmbrohemi dhe të mbrojmë aleatët tanë nga çdo sulm apo provokim.