Ulqini pret mbi 500 legjenda sportive: nisi “Mundiali i miqësisë” me homazh për pesë gjigantë

Siç njofton sportski.me, Ulqini u bë sërish këto ditë qendra e takimit të mbi 500 legjendave sportive, punonjësve sportivë dhe gazetarëve nga rajoni, në edicionin e pestë të manifestimit “Mundiali i miqësisë”, ideuar nga Pavle Pepgjonoviq.

Mbrëmja e së premtes në Qendrën e Kulturës iu kushtua kujtimit të pesë gjigantëve që shënjuan sportin, kulturën dhe jetën publike të ish-Jugosllavisë: kapitenit të Hajdukut Ivan Gudelj, shkrimtarit Bozho Koprivica, vaterpolistit të famshëm Goran Sukno, njërit prej trajnerëve më të rëndësishëm të basketbollit në këto treva Dushko Vujosheviq dhe legjendës së basketbollit Drazhen Dalipagiq. Përmes dokumentarëve të shkurtër dhe fjalëve të respektit, shkruan sportski.me, u ringjallën historitë e tyre.

Ceremonia zyrtare e hapjes u mbajt të shtunën në mesditë, ndërsa programi vijon me promovimin e librit “Haxhia nga Kosheva” kushtuar Faruk Haxhibegiqit, dokumentarin “Moca, një nga historitë më të bukura të futbollit — Momçillo Vukotiq”, promovimin e biografisë së trajnerit Zheljko Obradoviq dhe premierën malazeze të filmit për legjendën Dino Raxha.

Manifestimi, i cili prej kohësh ka tejkaluar kufijtë sportivë dhe është kthyer në simbol të bashkimit dhe miqësisë, vijon deri të dielën, me kujtimin edhe për gazetarin dhe komentatorin e njohur të basketbollit Edin Avdiq.