Ushqimi i pasigurt, OBSH: 1 në 9 persona në botë sëmuren nga ushqimi i kontaminuar

Gati 1 në 9 persona në botë sëmuret çdo vit nga ushqimi i kontaminuar, ndërsa mbi 1.5 milionë njerëz humbin jetën si pasojë e ushqimit të pasigurt.

Alarmi vjen nga Organizata Botërore e Shëndetësisë, e cila vlerëson se çdo vit regjistrohen rreth 866 milionë raste sëmundjesh të lidhura me ushqimin e kontaminuar. Më të prekurit janë fëmijët e vegjël. Edhe pse përbëjnë vetëm 9% të popullsisë globale, fëmijët nën moshën 5 vjeç mbajnë pothuajse një të tretën e barrës së këtyre sëmundjeve, me rreth 143 mijë vdekje të regjistruara në vitin 2021.

Sipas ekspertëve, shumica e rasteve shkaktohen nga bakteret, viruset dhe parazitët që transmetohen përmes ushqimit, ndërsa substancat kimike si plumbi dhe arseniku përbëjnë një rrezik të veçantë, pasi lidhen me sëmundje të zemrës, kancer dhe dëmtime të zhvillimit te fëmijët.

Përtej ndikimit në shëndet, ushqimi i pasigurt ka edhe pasoja të rënda ekonomike. OBSH llogarit se çdo vit humben rreth 310 miliardë dollarë nga mungesat në punë dhe kostot e trajtimit mjekësor.

Ekspertët theksojnë se një pjesë e madhe e këtyre rasteve mund të parandalohet përmes përmirësimit të higjienës, sigurisë ushqimore dhe kontrollit më të rreptë të produkteve që arrijnë në tryezën e konsumatorëve.