Ushtria e Jemenit: mbi 1.300 goditje në 24 orë ndaj Huthi-ve, 440 luftëtarë të neutralizuar në ofensivën “Agimi i Jemenit”

Ushtria e Jemenit ka njoftuar se ka kryer më shumë se 1.300 goditje ajrore gjatë 24 orëve të fundit në kuadër të ofensivës “Agimi i Jemenit” kundër pozicioneve të Huthi-ve, siç njofton Al Jazeera.

Sipas forcave të armatosura jemense, goditjet shënjestruan qendra komandimi, përqendrime trupash dhe rrugë furnizimi të Huthi-ve. Ushtria pretendon se janë neutralizuar 440 komandantë dhe luftëtarë të grupit dhe se janë shkatërruar ose nxjerrë jashtë funksionit 146 automjete dhe armë të rënda.

Në frontet e Taizit, njësitë qeveritare thanë se kanë zmbrapsur tentativat e Huthi-ve për të rimarrë pozicione dhe se kanë përparuar në terren. Edhe në frontet e Bab al-Mandebit, Dhubabit dhe al-Mudarabahut, forcat qeveritare thanë se kanë penguar tentativa infiltrimi dhe kanë goditur përforcime të Huthi-ve.

Qeveria jemense ka hedhur poshtë edhe pretendimin e mëparshëm të Huthi-ve se kishin ndalur avancimin drejt zonës së Ngushticës Bab al-Mandeb, duke konfirmuar se operacioni për rimarrjen e ngushticës vazhdon dhe se Huthi-t kanë pësuar humbje në njerëz dhe pajisje.

Siç thekson Al Jazeera, pretendimet e ushtrisë jemense për bilancin e operacioneve nuk janë verifikuar në mënyrë të pavarur. Ofensiva “Agimi i Jemenit”, e nisur më 5 tetor, synon rimarrjen e territoreve të kontrolluara nga Huthi-t, përfshirë kryeqytetin Sanaa.