Vajza 19-vjeçare e dy mjekëve të akuzuar në çështjen Mazonakis del sot para hetuesit

Vajza 19-vjeçare e dy mjekëve të akuzuar në çështjen e vdekjes së këngëtarit të njohur grek Giorgos Mazonakis del sot para hetuesit për të dhënë dëshminë e saj. Dëshmia e saj konsiderohet vendimtare për rrjedhën e hetimit, pasi pritet të sqarojë nëse edhe ajo vetë i ishte nënshtruar trajtimit kontrovers të plazmaferezës, rreth dhjetë ditë para vdekjes së artistit, siç njofton ERT. Sipas informacioneve, e reja ndodhej brenda ambienteve të klinikës në rrugën Karneadou në momentin kur këngëtari humbi jetën.

Roli i prindërve mbetet një nga pikat më të tensionuara të çështjes. Mjeku 58-vjeçar i akuzuar – patolog, bashkëshorti dhe bashkëakuzuari i mjekes – sipas informacioneve pohon se nuk kishte dijeni që kjo procedurë mjekësore ishte aplikuar edhe mbi vajzën e tyre; nëse është kryer, sipas tij, ka ndodhur pa dijeninë e tij, duke u distancuar kështu nga pretendimi mbrojtës i bashkëshortes së tij. Ndërkohë, mjekja e akuzuar, 56-vjeçare, sipas burimeve ka pretenduar se e kishte nënshtruar edhe vajzën e saj 19-vjeçare në trajtim plazmafereze, duke e konsideruar metodën të sigurt. Avokati penal Kostas Daltas e përmbledh argumentin e mbrojtjes duke thënë se mjekja i konsideronte këto veprime kaq të padëmshme, sa i bëri edhe tek fëmija i saj.

Sipas raportimeve të emisionit “Live News”, 19-vjeçarja pritet të kthehet kundër nënës së saj në dy mënyra: së pari, duke dorëzuar tek autoritetet videon e plazmaferezës së saj, ku duket e qetësuar, dhe së dyti duke mbështetur babanë e saj dhe duke konfirmuar atë që 58-vjeçari ka deklaruar. Po sipas të njëjtave raportimeve, e reja – e cila merrej me karate dhe garonte në kategorinë 53 kg – duket se kishte dashur të humbiste disa kilogramë, çka mund të ketë qenë arsyeja e procedurës. Ndërkohë, hetuesi pritet të kërkojë sqarime nëse asaj i ishte dhënë ndonjë substancë qetësuese nga nëna e saj para trajtimit.

Konteksti i hetimit për vdekjen e këngëtarit bëhet gjithnjë e më i rëndë: gjetjet e para histologjike tregojnë se në organizmin e Mazonakis, përveç propofolit, janë zbuluar edhe benzodiazepina – një kategori ilaçesh që veprojnë si frenues të sistemit nervor qendror. Autoritetet gjyqësore po shqyrtojnë efektin e kombinuar të substancave, pasi njëra shumëfishon fuqinë e tjetrës, duke shkaktuar ngadalësim të frymëmarrjes deri në apnea të plotë, shok kardiovaskular dhe rrezik të menjëhershëm për koma të thellë. Hapi tjetër pritet të jetë analiza sasiore e substancave, për të përcaktuar nëse ka pasur ndonjë reagim toksik në kombinim me plazmaferezën.

Në lupën e hetimit kanë hyrë edhe dy elementë të tjerë: mjekët refuzuan të hipnin në ambulancën që transportoi Mazonakis kur mësuan se do ta çonin në spitalin “Elpis” – më herët ishin gati ta shoqëronin, kur mendonin se transporti do të bëhej në “Evangelismos”, tri minuta larg klinikës së rrugës Karneadou. Këtë e ka konfirmuar për ERTnews presidenti i punonjësve të EKAV, Giorgos Mathiopoulos. Gjithashtu, Autoriteti kundër Pastrimit të Parave ka identifikuar një llogari me miliona euro në një bankë europiane, përfitues të së cilës thuhet se janë dy mjekët e rrugës Karneadou.