Van Gogh-i me 180 milionë dollarë: Sotheby’s nxjerr në ankand koleksionin legjendar Blaquier

Dymbëdhjetë kryevepra impresioniste të fshehura për gati gjysmë shekulli nga sytë e publikut do të dalin nën çekiç në Nju Jork më 18 nëntor, në një shitje që pritet të thyejë rekorde botërore. Sotheby’s njoftoi të mërkurën se do të ofrojë 12 piktura impresioniste dhe post-impresioniste nga koleksioni i familjes argjentinase Blaquier-Arrieta, me vlerë parashitjeje rreth 450 milionë dollarë, siç njofton gazeta britanike The Times.

Ylli i koleksionit është “Châtaigniers en fleurs” (Gështenjat në lule) e Vincent van Gogh-ut, pikturuar në fund të majit 1890 në fshatin francez Auvers-sur-Oise, vetëm dy muaj para vdekjes së artistit. Sotheby’s pret që piktura të shitet për më shumë se 180 milionë dollarë, çka do të ishte rekord i ri ankandi për Van Gogh-un — rekordi aktual është 117 milionë dollarë, arritur në vitin 2022. Vepra, e blerë nga familja në vitin 1975, nuk është ekspozuar publikisht që prej vitit 1964.

Edhe më të rralla janë veprat e tjera të koleksionit, i cili përshkruhet si një “mini-Musée d’Orsay”: portreti “Arlequin” i Paul Cézanne-it, pikturuar mes viteve 1888 dhe 1890 me djalin e tij 17-vjeçar si model, është e vetmja nga katër pikturat e Harlekinit e artistit që ndodhet ende në duar private dhe pritet të arrijë rreth 120 milionë dollarë — rekord për Cézanne-in. Koleksioni përfshin gjithashtu vepra të Renoir-it, Monet-së, Degas-it, Pissarro-së dhe Gauguin-it.

Koleksioni u ndërtua nga koleksionistja argjentinase María Elena “Nelly” Arrieta de Blaquier dhe bashkëshorti i saj, industrialisti Carlos Pedro Blaquier, të cilët në vitet 1970 blinin vepra me cilësi muzeale nga galeritë kryesore të Londrës. Pesë nga pikturat do të ekspozohen në Sotheby’s në Londër, para një turneu ndërkombëtar në Taipei, Hong Kong dhe Paris. Sipas raportimeve, Sotheby’s ia rrëmbeu koleksionin rivalit Christie’s me një komision të ulët. Si kurorezim i shitjes do të jetë pikërisht Van Gogh-u: Simon Shaw, zëvendëskryetari i Sotheby’s, e përshkruan pikturën si një nga veprat “më të bukura” të Van Gogh-ut.