Vance e pranon: Administrata Trump keqmenaxhoi publikimin e dosjeve të Epstein

Zëvendëspresidenti i SHBA-së J.D. Vance pranoi se administrata Trump “gaboi” në trajtimin e njoftimit dhe publikimit të dosjeve të Jeffrey Epstein, duke thënë se Shtëpia e Bardhë kishte rritur pritshmëritë përpara se të zbulohej se nuk kishte informacione të reja të rëndësishme.

“Do të jem plotësisht i sinqertë, ne e prishëm plotësisht menaxhimin e komunikimit të dosjeve të Epstein”, tha Vance në një podcast të publikuar të mërkurën. Ai shtoi, megjithatë, se nuk beson se problemet e komunikimit ishin për shkak të një përpjekjeje për mbulim të të dhënave.

Vance ia hodhi pjesën më të madhe të fajit Prokurores së Përgjithshme të atëhershme, Pam Bondi, duke thënë se ajo “e ekzagjeroi atë që ishte dhe nuk ishte” në dosje.

Bondi kishte rritur pritshmëritë përpara publikimit të parë të dokumenteve në shkurt të vitit 2025, duke deklaruar në një intervistë televizive se dosjet ishin “në tavolinën e saj” për shqyrtim dhe duke lënë të kuptohet se do të pasonin më shumë zbulime.

Departamenti i Drejtësisë kishte ftuar gjithashtu ndikues konservatorë në Shtëpinë e Bardhë dhe kishte shpërndarë dosjet e çështjeve, por ky veprim shkaktoi reagime të ashpra, pasi dokumentet përmbanin pak informacione që nuk diheshin tashmë.

Reagimet u intensifikuan më vonë kur Departamenti i Drejtësisë dhe FBI-ja arritën në përfundimin se nuk kishte prova që Epstein mbante të ashtuquajturën “listë klientësh” dhe njoftuan se nuk do të publikoheshin dosje të tjera. Ky zhvillim zemëroi shumë mbështetës të Donald Trump , të cilët kishin pritur më shumë zbulime.

Vance tha se qeveria duhet të kishte “bërë gjithçka publike që nga fillimi”, pasi të kishte përfunduar më parë shqyrtimin e nevojshëm për të mbrojtur viktimat dhe për të fshirë informacionin e ndjeshëm.

Çfarë tha ai për lidhjet e Epstein me CIA-n dhe Mossad-in?

Në të njëjtën intervistë gati tre-orëshe, të regjistruar në Austin të Teksasit, zëvendëspresidenti amerikan pohoi gjithashtu se Epstein “qartësisht” kishte lidhje me agjencitë e inteligjencës amerikane dhe izraelite, duke iu referuar CIA-s dhe Mossadit .

Megjithatë, ai nuk paraqiti asnjë provë për të mbështetur pretendimin e tij. Autoritetet amerikane nuk kanë arritur kurrë në përfundimin publikisht se Epstein kishte lidhje me ndonjë agjenci inteligjence.

Epstein u përball me dy dekada akuzash për abuzim seksual dhe trafikim vajzash të mitura, disa prej të cilave vetëm 14 vjeç. Ai u arrestua në korrik 2019 me akuza federale për trafikim në New York , por vdiq në burg në gusht të atij viti përpara se të përfundonte gjyqi i tij.

“Fushatë ndikimi” kundër marrëveshjes me Iranin

Vance gjithashtu pretendoi se individë brenda qeverisë izraelite u përpoqën të minonin negociatat e administratës Trump me Iranin përmes një fushate të koordinuar ndikimi.

Ai citoi një raport të kohëve të fundit të revistës Time që pretendonte se ish-menaxheri i fushatës së Trump, Brad Parscale , pranoi miliona dollarë për të ndihmuar me një fushatë ndikimi të mbështetur nga Izraeli që synonte të ndikonte në opinionin publik amerikan mbi një marrëveshje për t’i dhënë fund luftës me Iranin .

Vance e quajti përpjekjen “një fushatë jashtëzakonisht të mirëfinancuar që synonte prishjen e negociatave dhe parandalimin e arritjes së një marrëveshjeje”.