Vazhdojnë protestat kundër rastit “Monstra”

Këshilli Organizativ i Protestave kundër rastit “Monstra” përmes një konference për media ka përsëritur edhe një herë kërkesat e tyre për drejtësi të pavarur dhe objektive në Maqedoni. Anëtari i Këshillit Organizativ, Daim Luçi deklaroi se shteti maqedonas po ushtron dhunë dhe presion ndaj popullit shqiptar në Maqedoni.

“Derisa ky shtet ushtron dhunë mbi pjesën dërmuese të popullatës së saj, derisa ky shtet nuk e respekton ligjin dhe të drejtat e qytetarëve të saj, ne kuptojmë se në këtë shtet një populli të tërë i mohohet e drejta dhe liria e tij, ne besojmë se shteti dhe ligji është në mbrojtje vetëm të një etnie. Nëse koncepti i demokracisë është vetëm akt formal në letër dhe shprehje, atëherë vlen të besojmë se pushteti në këtë shtet është centralist me funksionimin e njëjtë të sistemit të dikurshëm diktatorial komunist”, tha Daim Luçi nga këshilli organizativ.

Ai lexoi edhe gjashtë pika me të cilat kërkohet lirimi i 6 të arrestuarve në rastin “Monstra” dhe 6 protestuesve, të cilët u dënuan me nga tre vjet burg, dorëheqja e prokurores dhe gjykatësit në rastin “Monstra”, si dhe ministres së Punëve të Brendshme. ‘Përveç këtyre, të enjten u kërkua edhe mbikëqyrje permanente edhe nga përfaqësues ndërkombëtarë mbi sistemin juridik në Maqedoni, si dhe prononcim publik nga ministri i drejtësisë për dënimet e shqiptuara ndaj 6 shqiptarëve me burg të përjetshëm dhe po kështu protestuesve me nga 3 vjet burg’-shkruan Agjencia e Lajmeve INA.

Familjari i të arrestuarve, Bedri Ajdari, tha se protestat do të vazhdojnë dhe ajo e radhës do të mbahet edhe këtë të premte nga ora 13:45. Ai i ftoi studentët, intelektualët dhe të gjithë shqiptarët nga të gjitha qytetet e Maqedonisë që të mbështesin këto protesta.