Veliaj: Ky President në ikje është përçarësi i vendit

Kryebashkiaku i Tiranës, Erion Veliaj doli në një konferencë për shtyp paraditen e së premtes, duke sulmuar edhe një herë tjetër Presidentin e Republikës, pasi Bujar Nishani një ditë më parë kishte dhënë një deklaratë për mediat, ku kishte kërkuar nga drejtësia që të hetonte Veliajn për shpifje.

“Presidenti doli në konferencë vetëm për interesin e tij personal, siç ka bërë gjithmonë. Asnjëherë për çështje kombëtare nuk ka thënë gjë. Presidenti është kthyer në një zyrë shtypi i PD-së. Është përçarësi i vendit, ka përdorur çdo mundësi për ta përçarë shoqërinë. Kurrë nuk ka folur për interesin publik ky President në ikje”, u shpreh Veliaj.

Më tej, Veliaj shtroi një pyetje për Nishanin: “Çfarë mendon Presidenti për 5 pallatet te diga e liqenit, pak metra nga këndi i lodrave? Kur ka mendim për këndin e lodrave, duhet të ketë dhe për këtë. Basha e ka dhënë lejen pasi qeveria kishte ndaluar ndërtimet në gjithë territorin e vendit. Askush nuk e ka aprovuar ndërtimin te diga”.