Venezuela njofton stervitje të medha ushtarake ndërsa SHBA rrit presionin

Qeveria e Venezuelës deklaroi këtë javë se ka nisur një mobilizim të gjerë ushtarak dhe ka filluar stërvitjen e civilëve për luftim, duke e paraqitur këtë si një hap mbrojtës ndaj asaj që e quajti një kërcënim në rritje nga Shtetet e Bashkuara.

Masat vijnë ndërkohë që Uashingtoni ka intensifikuar operacionet ushtarake në Karaibe, duke vrarë dhjetëra njerëz në një fushatë që, sipas zyrtarëve amerikanë, synon rrjetet e trafikut të drogës. Por zyrtarë amerikanë, në biseda private, kanë thënë se qëllimi përfundimtar është rrëzimi i presidentit Nicolás Maduro të Venezuelës.

Zoti Maduro dhe drejtues të lartë të ushtrisë thanë këtë javë se kanë aktivizuar zona të reja mbrojtjeje në të gjithë vendin dhe u kanë bërë thirrje civilëve t’i bashkohen asaj që e përshkruan si një përpjekje patriotike për të mbrojtur kombin.

Prej disa ditësh, zyrtarët venezuelas po e paralajmërojnë publikun. Ministri i Mbrojtjes, Vladimir Padrino López, u tha venezuelasve këtë javë të “përgatiten për më të keqen”, duke përmendur atë që e quajti një “kërcënim serioz” nga presidenti Trump, i cili i ka njoftuar Kongresit se Shtetet e Bashkuara ndodhen në një “konflikt të armatosur” me disa kartele droge.

Televizioni shtetëror i Venezuelës prej kohësh transmeton pamje të burrave dhe grave që zvarriten në baltë me armë, kalojnë lumenj me litarë dhe qëllojnë nën drejtimin e ushtarëve. Por kohët e fundit, janë shfaqur edhe ushtrime evakuimi dhe pamje të ushtrisë që lëviz armë dhe dokumente nga bazat.

“Tani po bëjnë gjëra që në fakt do të kishin rëndësi në rast se Shtetet e Bashkuara ndërhynin,” tha Andrei Serbin Pont, president i grupit kërkimor latin-amerikan CRIES, i cili ka studiuar çështjet ushtarake të Venezuelës për 10 vjet.

Zyrtarët venezuelas, duke përmendur vështirësitë e ushtrisë amerikane në Vietnam dhe Afganistan, janë përpjekur të paraqiten të fortë, duke pretenduar se disa milionë luftëtarë janë gati të mbrojnë vendin.

Por ekspertët thonë se ky numër është i pabesueshëm dhe se retorika e qeverisë për mbrojtjen e atdheut mund të ketë më shumë të bëjë me mobilizimin e mbështetjes mes qytetarëve sesa me një përgatitje reale, pasi ushtria e Venezuelës nuk mund të krahasohet me atë të SHBA-së.

Qeveria ka rekrutuar kryesisht milici nga grupe besnike ose të lidhura me qeverinë. Shumica e të rekrutuarve janë të lidhur me partinë socialiste në pushtet, komitetet e lagjeve dhe rrjetet e shpërndarjes së ushqimit, sipas ekspertëve.

“Nuk jemi këtu për të bërë lojëra,” tha zoti Padrino López në një fjalim televiziv. “Po përgatitemi.”

Ndërsa Venezuela ka forca të konsiderueshme ushtarake dhe sisteme armatimi, zoti Serbin Pont tha se pjesa më e madhe e pajisjeve të saj janë projektuar për të menaxhuar paqëndrueshmëri të brendshme ose konflikte rajonale, jo për t’u përballur me një sulm në shkallë të gjerë nga ushtria më e madhe e hemisferës.

“Këto janë sisteme armatimi që kurrë nuk janë menduar vërtet për të ndaluar një ndërhyrje të SHBA-së,” shtoi ai. “Nuk mund të rezistosh fuqisë konvencionale ushtarake amerikane.”

Në qytetin verior të La Guaira-s të enjten, ministri i brendshëm Diosdado Cabello drejtoi betimin e asaj që zyrtarët e quajtën një “milici fshatare” për të “mbrojtur atdheun.”

“Kushdo që mendon se kjo është një situatë që mund të zgjidhet duke hedhur dy bomba dhe pastaj të gjithë dorëzohen, nuk na njeh,” tha ai. “Nuk kanë as idenë më të vogël se nga çfarë janë bërë njerëzit e Venezuelës.”

Por ekspertët thonë se vetëm një pjesë e vogël e popullsisë ka gjasa të mobilizohet në rast të një ndërhyrjeje amerikane.

“Ka njerëz që mund ta mirëpresin me krahë hapur,” tha zoti Serbin Pont. “Dhe pastaj shumë të tjerë që thonë: ‘E di çfarë? Për sa kohë që mund të shkoj në punë nesër ose të vë bukën në tryezë, s’më intereson fare.’”