Veseli: Kosova, e përkushtuar në axhendën euroatlantike

“Kosova është e përkushtuar për të vazhduar punën në axhendën euroatlantike”, theksoi sot kryetari i Kuvendit të Kosovës, Kadri Veseli, gjatë takimit me një delegacion të gjerë nga Këshilli Gjerman për Marrëdhënie të Jashtme, të kryesuar nga dr. Harald Kindermann, Sekretar gjeneral i Këshillit.

Kryetari Veseli i njohu mysafirët nga Gjermania për zhvillimet e fundit në Kuvendin e Kosovës, për situatën politike në vend, veçanërisht, pas vendimeve shumë të rëndësishme të institucioneve evropiane për Marrëveshjen e Stabilizim-Asociimit, liberalizimin e vizave dhe pranimin e Kosovës në UEFA.

Veseli theksoi ndikimet pozitive që këto vendime do të kenë për Kosovën dhe qytetarët e saj, si në rrafshin e brendshëm, ashtu edhe sa i përket perspektivës evropiane dhe përfaqësimit ndërkombëtar të vendit.

Kryetari Veseli foli, po ashtu, edhe për raportet e shkëlqyera që Kosova dhe Gjermania kultivojnë midis tyre.

Përfaqësuesit e Këshillit Gjerman për Marrëdhënie të Jashtme, nga ana e tyre, u interesuan për situatën aktuale në Kosovë, zhvillimet që shoqëruan jetën parlamentare të Kosovës në muajt e fundit, për procesin e integrimit evropian të saj dhe një varg zhvillimesh të tjera.