Veseli: Terrorizmi nuk do t’i rrënojë vlerat evropiane
Autoritetet më të larta kosovare dënuan sot ashpër sulmet terroriste në Belgjikë.
Kryetari i Kuvendit të Republikës së Kosovës, Kadri Veseli shprehu solidaritet me qytetarët dhe institucionet e Belgjikës, duke thënë se sulmet e sotme terroriste në Bruksel, janë sulme barbare që synojnë të ndryshojnë vlerat dhe institucionet tona më të çmuara që ka krijuar njerëzimi, demokracinë, liritë e njeriut dhe projektin madhështor të Evropës së Bashkuar.
Veseli nëpërmjet një deklarate, ka dënuar ashpër sulmet terroriste në Bruksel, për pasojë të të cilave mbetën të vdekur disa persona.
“Sulmet e sotme terroriste në kryeqytetin e Bashkimit Evropian në Bruksel, janë sulme barbare që synojnë të ndryshojnë vlerat dhe institucionet tona më të çmuara që ka krijuar njerëzimi, demokracinë, liritë e njeriut dhe projektin madhështor të Evropës së Bashkuar. Në këtë ditë të rëndë, populli dhe institucionet e Kosovës ndajnë brengën dhe dhimbjen me qytetarët dhe institucionet e shtetit belg. Ky sulm është sulm edhe ndaj aspiratave tona integruese euro-atlantike. Terrorizmi po lëndon dhe shkakton viktima, por kurrë nuk do të arrijë t’i rrënojë vlerat tona evropiane. Civilizimi gjithmonë triumfon mbi barbarinë, ashtu sikurse demokracia mbi çdo ideologji e fanatizëm të dhunshëm”, thuhet në deklaratën e kryetarit Veseli.
Ministri i Integrimeve Evropiane i Kosovës, Bekim Çollaku pëmes një postimi në Twitter shkruan “në solidaritet të plotë me Brukselin dhe Belgjikën! Mendjen e kemi te viktimat e këtyre sulmeve të tmerrshme, si dhe te familjet e tyre”.
Kryetari i Lëvizjes Vetëvendosje, Visar Ymeri, u shpreh se “në këto momente dëshirojmë të shprehim solidaritetin tonë me ta dhe me institucionet në Belgjikë. Pak ditë më parë u godit me sulme të ngjashme edhe Turqia, e fatkeqësisht këto ngjarje po ndodhin aq shpesh në botë, sa nuk po mbetet kohë as për reflektimin e duhur njerëzor. Të gjitha këto sulme janë të dënueshme, e dhimbja është e njëjtë për të gjitha viktimat. Por sot, vëmendja dhe solidariteti ynë shkon tek Brukseli, kryeqendra e Bashkimit Evropian”.
Kryetari i Aleancës për Ardhmërinë e Kosovës Ramush Haradinaj nëpërmjet një njoftimi për shtyp shprehet i shokuar nga sulmet terroriste që kanë ndodhur sot në Bruksel.
“Jam i shokuar nga sulmet e sotme terroriste në Bruksel. Ngushëllimet e mia më të forta për familjarët e viktimave dhe për popullin e Qeverinë Belge. Kjo që po ndodhë sot në kryeqytetin e Evropës, është tragjedi e përbashkët”, thekson Haradinaj.
