Videoskandali në QSUT, Gjykata arrest me burg për Evarist Pashën, pritet masa për 2 të tjerët

Gjykata e Tiranës ka caktuar sot masën arrest me burg për Evarist Pashën, njërin prej personave të përfshirë në videoskandalin në QSUT, ku tre të rinj ngacmonin seksualisht një minorene pa ndjenja.

25-vjeçari Evarist Pasha, nga Tepelena, ishte sekser i një agjencie funerale në afërsi të QSUT-së, ndërsa më herët ai është dënuar për tentativë trafikimi droge e armëmbajtje pa leje. Ai shfaqet në video teksa dy djemtë ngacmojnë vajzën e shtrirë, ndërsa qesh me veprimet e tyre. Mbi të rëndon akuza e ngacmimit seksual.

Po sot gjykata pritet të japë vendimin edhe për dy protagonistët e videos Albi Bocaj, 18 vjeç dhe Patrik Kaço, 18 vjeç, të dy banues në Tiranë. Ata kanë qenë personat që e kanë shoqëruar 17-vjeçaren në urgjencë nga një lokal nate, ku kishte humbur ndjenjat për shkak të abuzimit me alkoolin.

Ndalimi i tyre u krye në vijim të hetimeve mbi ngjarjen e videos së publikuar në rrjetin social youtube, ku shfaqen imazhet e tre djemve të cilët ngacmojnë seksualisht një vajzë 17-vjeçare në QSUT. Dy të rinjtë Bocaj dhe Kaço, sipas prokurorisë akuzohen për moskallëzim krimi.