Torturimi i dy të moshuarave pranga nipit, i dyshuar në vrasje

Dy persona janë arrestuar ditën e sotme pasi dyshohen të jenë autorët e vrasjes së dy të moshuarave në Durrës. Sipas burimeve të policisë dy të arrestuarit janë me origjinë nga Elbasani dhe Shijaku.

Më shumë se dy javë nga masakrimi i dy të moshuarave në Durrës, policia e qytetit bergdetar arreston dy persona, mes tyre nipin e njërës prej viktimave, dhe shpall në kërkim një të tretë. Autorët e dyshuar të dy kunatave, Elsa dhe Gjinovefa Vava, 72 dhe 77 vjeç, janë persona me precedentë të mëparshëm penalë.

Policia arrestoi Velson Elmazin 28 vjec, lindur dhe banues ne Elbasan, i dënuar më parë me 4 vjet burgim për veprën penale “marrëdhënie seksuale me dhunë” si dhe i dënuar për “prodhim, shitje lëndësh narkotike”.

Po ashtu, në pranga u vu Artur Kacanolli 28 vjec lindur dhe banues në Shijak, njëherësh djali i motrës së Gjinovefa Vavës. Ai u arrestua në flagranë për veprën penale të majtjes pa leje të municioneve luftarake si dhe si i dyshuar për bashkëpunim në vrasjen e tezes së tij dhe të moshuarës tjetër. Policia e Durrësit thotë se po punon ende për të dokumentuar rolin e tij në raport me ngjarjen.

Sakaq, gjatë kontrollit në banesën e tij u gjet një sasi prej 65 fishekësh luftarake, 4 ndezësa detonatore si dhe nje sasi fitili zjarrpërcjelles.

Ndërkohë, u shpall në kërkim Indrit Shqaja, 40 vjeç lindur dhe banues në Shijak i dënuar më parë për vepra penale kundër jetës dhe i dyshuar si i përfshirë në një sërë veprash të rënda kriminale.

Si rezultat i punes hetimore te ndërmarrë është bërë e mundur të zbardhet plotësisht mekanizmi i kësaj ngjarje, të saktësohet mënyra e ekzekutimit si dhe indicja që i ka çuar autorët drejt këtij krimi.

Nga hetimet e kryera nga Policia e Durrësit, ka rezultuar se krimi është ekzekutuar nga Indrit Shaqo dhe Velson Elmazi, të cilët kanë hyrë në banesë pasi kanë thyer dritaren e katit të parë të banesës, me qëllim grabitjen e shumave të parave dhe floririt në të.

Ndërkohë që kanë hyrë në banesë  Indrit Shaqo ka qenë i armatosur me nje armë zjarri, pistoletë. Për të realizuar qellimin e tyre kriminal autorët kanë lidhur ne gjymtyrë dhe iu kanë bllokuar gojën dy të moshuarave, duke iu shkaktuar asfiksinë. Nga hetimet e deritanishme rezulton se shuma që është mundur të përvetësohet në banesë është rreth 2 milionë lekë.

Dy të moshuarat, kunata me njëra-tjetrën, u vranë më 2 Shtator vrarë në mënyrë mizore në banesën e tyre, të mbytura me qese plastmasi dhe me duart e lidhura me litar.

(Në foto: Bashkëpuntori në krim Artur Kacanolli 28 vjec, njëherësh djali i motrës së Gjinovefa Vavës)