Vuçiç: Së shpejti takim me Thaçin dhe Mustafën

Kryeministri serb, Aleksandër Vuçiç ka thënë se pret që së shpejti të takohet me presidentin e Kosovës, Hashim Thaçi dhe kryeministrin e Kosovës, Isa Mustafa.

Shefi i qeverisë serbe  ka shtuar se të dyja palët duhet të punojnë së bashku në interes të serbëve dhe shqiptarëve, raportojnë mediat serbe, bën të ditur Klan Kosova.

Vuçiç në një konferencë për shtyp në Bruksel kur është pyetur se gjatë bisedimeve me zyrtarë të lartë amerikanë dhe evropianë a ka marrë vesh se Perëndimi do t`i japë një shtysë autoriteteve në Prishtinë për të kryer detyrat e saj rreth çështjes së marrrëveshjeve të Brukselit, si dhe krijimit të Asociacionit të Komunave me shumicë serbe ka thënë se “”as Beogradi nuk bëri gjithçka që është pritur dhe do të vazhdojnë bisedimet me Prishtinën, në dialogun që është i rëndësishëm për Serbinë”.

Sipas tij, të dyja palët kanë shumë për të bërë dhe se nuk do të jetë e lehtë dhe e thjeshtë, por ka theksuar se nuk dëshiron që të thotë diçka të shëmtuar dhe të keqe për këdo.

“Unë jam i interesuar vetëm në rezultate dhe ato janë paqja dhe stabiliteti për serbët dhe shqiptarët, që të shikojmë se çfarë mund të bëjmë së bashku në të ardhmen”, ka thënë Vuçiç.

Kreu i qeverisë serbe gjithashtu ka bërë të ditur se një konferencë biznesi do të organizohet në Nish së bashku me Shqipërinë, duke thënë se Serbia dëshiron të bashkëpunojnë me këtë vend dhe që “rrugët të jenë të kalueshme për shqiptarët”.