Vuçiç takon Mitsotakis në SHBA: Greqia e mbështet dialogun, por “veprimet e njëanshme nuk kontribuojnë në të”
Sipas komunikatës së lëshuar të martën, Vuçiç tha se popullin serb dhe ai grek i lidh një miqësi e sinqertë dhe se është e nevojshme të punohet për forcimin e bashkëpunimit ekonomik.
Vuçiq tha se e falënderon Greqinë për mbështetjen që i jep dialogut midis Beogradit dhe Prishtinës për normalizimin e marrëdhënieve.
Në komunikatë thuhet se Vuçiç e njoftoi kryeministrin grek edhe me, siç u shpreh ai, problemet që kanë lindur pas vendimit të autoriteteve në Kosovë për t’iu vënë taksë prodhimeve të importuara nga Serbia.
Mitsotakis, në anën tjetër, tha se Greqia e mbështet dialogun, por konsideron se “veprimet e njëanshme nuk kontribuojnë në të”.
Mitsotakis po ashtu tha se Greqia nuk ndryshon qëndrim kur është në pyetje njohja e Kosovës.
Greqia, së bashku me Spanjën, Sllovakinë, Qipron dhe Rumaninë, janë pesë vendet e Bashkimit Evropian që nuk e njohin ende pavarësinë e Kosovës, të shpallur në shkurt të vitit 2008.
Javë më parë, presidenti i Çekisë, Millosh Zeman, ka thënë se do të diskutojë me zyrtarët kushtetues mundsinë që vendi i tij ta tërheqë njohjen e Kosovës si shtet të pavarur. Por kjo deklarate u kundërshtua menjëherë nga Kryeministri dhe Ministri i Jashtëm, i Çekisë.
Serbia, tash e sa kohë, thuhet se është angazhuar në një fushatë për të bindur shtetet që e kanë njohur Kosovën që të zmbrapsen nga një hap i tillë.
