Zelenskiy anulon planin për t’iu drejtuar ligjvënësve amerikanë
![](https://24-ore.com/wp-content/uploads/2023/04/zelenski.jpeg)
Presidenti ukrainas, Volodymyr Zelenskiy, anuloi planet t’u lidhur drejtpërdrejt me video me ligjvënësit amerikanë për t’u bërë thirrje atyre që të miratojnë ndihmat për vendin e tij, ndërsa një betejë partiake lidhur me politikat amerikane të imigracionit kërcënon të minojë kërkesën e Presidentit Joe Biden për miliarda dollarë ndihma për Ukrainën në luftën e saj kundër Rusisë.
Republikanët dhe demokratët kanë debatuar për javë të tëra në Senat dhe Dhomën e Përfaqësuesve mbi kërkesën e bërë në tetor nga zoti Biden që Kongresi të miratojë një paketë ndihme prej 106 miliardë dollarësh për Ukrainën, Izraelin, dhe fonde për shtimin e sigurisë në kufirin e Shteteve të Bashkuara me Meksikën dhe interesat amerikane në Indo-Paqësor.
Kryetari i Dhomës së Përfaqësuesve, republikani Mike Johnson, tha se fondet për Ukrainën, e cila po lufton agresionin rus që nga shkurti i vitit 2022, duhet të lidhen me një “ndryshim transformues” të politikës amerikane për imigracionin.
![Mike Johnson](https://gdb.voanews.com/bad9d7cb-3007-41b2-a020-eba5277444cf_w650_r1_s.jpg)
Senati i kontrolluar nga demokratët paraqiti një projektpropozim prej 110.5 miliardë dollarësh që trajton kërkesën e presidentit. Udhëheqësi i shumicës në Senat, Chuck Schumer tha se ai do të përpiqet të thyejë ngërçin duke u ofruar republikanëve mundësinë për të shtuar një amendament për kufirin tek ligji i ndihmave për Ukrainën dhe Izraelin.
![Chuck Schumer](https://gdb.voanews.com/a77f640c-a811-4370-9ecd-36427cba490a_w250_r1_s.jpg)
“…ishin republikanët ata që e ngritën çështjen e kufirit. Ata kanë përgjegjësinë nëse besojnë se çështja e kufirit duhet të lidhet me paketën e ndihmave për Ukrainën. Le të propozojnë një amendament që mund të marrë 60 vota”, tha zoti Schumer në një konferencë shtypi.
![Mitch McConnell](https://gdb.voanews.com/01000000-0a00-0242-0995-08dbe662c2a9_w250_r1_s.jpg)
Udhëheqësi i pakicës republikane në Senat, Mitch McConnell, i cili foli menjëherë pasi zoti Schumer bëri propozimin për amendamentin, tha se ai do t’i nxiste republikanët e Senatit që të votojnë kundër projektpropozimit të mbështetur nga Demokratët.
“Jemi seriozë kur flasim për ndryshime të rëndësishme në mënyrën se si e mbrojmë kufirin tonë jugor si pjesë e paketës së plotë”, tha zoti McConnell. “Shpresoj që të gjithë anëtarët tanë të votojnë kundër”, tha republikani McConnell.
Anëtarë të Dhomës së Përfaqësuesve dhe të Senatit morën pjesë në takime informuese me dyer të mbyllura me zyrtarë të lartë të administratës së Presidentit Biden, ku pritej të fliste edhe zoti Zelenskyi përmes një lidhje me video. Por Senatori Schumer njoftoi se udhëheqësi ukrainas nuk ishte në gjendje të merrte pjesë.
“Diçka ndodhi minutën e fundit”, tha për gazetarët zoti Schumer.
Senatorët thanë se takimi i tyre ishte shoqëruar me nota të ashpra. Zoti Schumer tha se një ligjvënës, të cilin ai nuk e identifikoi, i kishte bërtitur një prej gjeneralëve të lartë.