Von der Leyen dhe Costa vlerësojnë armëpushimin SHBA-Iran

Zyrtarët e BE-së i janë bashkuar grupit të politikanëve që kanë mirëpritur armëpushimin midis Iranit dhe Shteteve të Bashkuara të Amerikës.

“E mirëpres armëpushimin dyjavor që SHBA-ja dhe Irani ranë dakord mbrëmë. Ai sjell qetësimin e nevojshëm të tensioneve”, tha sot presidentja e Komisionit Evropian Ursula von der Leyen.

“Falënderoj Pakistanin për ndërmjetësimin e tij”, shkroi ajo në X.

“Tani është thelbësore që të vazhdohet me negociatat për një zgjidhje të qëndrueshme për këtë konflikt”, shtoi Von der Leyen.

Presidenti i Këshillit Evropian, Antonio Costa u bëri thirrje të gjitha palëve të zbatojnë kushtet në mënyrë që të arrihet paqe e qëndrueshme në rajon.

“BE-ja është e gatshme të mbështesë përpjekjet e vazhdueshme dhe mbetet në kontakt të ngushtë me partnerët e saj në rajon”, tha Costa në X, duke falënderuar Pakistanin për ndihmën e tij në lehtësimin e marrëveshjes.

Diplomatja më e lartë e bllokut, Kaja Kallas tha se armëpushimi ishte një hap prapa nga pragu i krizës pas disa javësh përshkallëzimi.

“Armëpushimi krijon një mundësi të nevojshme për të zbutur kërcënimet, për të ndaluar raketat, për të rinisur transportin detar dhe për të krijuar një hapësirë ​​për diplomacinë drejt një marrëveshjeje të qëndrueshme”, shkroi Kallas.

“Ngushtica e Hormuzit duhet të hapet sërish për kalim”, shtoi ajo.

“Dera e ndërmjetësimit duhet të mbetet e hapur, pasi shkaqet themelore të luftës mbeten të pazgjidhura”, paralajmëroi Kallas.

“BE-ja është e gatshme të mbështesë këto përpjekje dhe është në kontakt me partnerët në rajon”, tha ajo.

Kallas ka planifikuar të vizitojë sot Arabinë Saudite. //a.i/