Zv.kryeministri rus: Perëndimi, në Ukrainë do të shkaktojë plagën e cila do të rrjedh gjak për dekada
Zëvendës kryeministri i parë rus, Igor Shuvalov, ka deklaruar se Perëndimi është duke zgjatur konfliktin në Ukrainë nëpërmjet qëndrimit mosmirënjohës ndaj Rusisë.
Shuvalov në fjalimin e tij në Forumin Ekonomik Botëror në Davos theksoi se vendet perëndimore me sanksionet duan të dënojnë Rusinë. “Perëndimi dëshiron që Rusia të mbetet në pozitë të njëjtë. Perëndimi i thotë Rusisë: ‘Shko në këndin tënd. Do t’i mësosh leksionet përmes sanksioneve”, ka thënë zëvendës kryeministri i Rusisë.
Shuvalov ka theksuar se është strategjia e gabuar, që është pengesa më e madhe në arritjen e paqes në Ukrainë.
“Perëndimi nuk e sheh Rusinë si një partner të barabartë, dhe nga konflikti në Ukrainë do të shkaktojë plagën e cila do të rrjedh gjak për dekada të tëra”, tha Shuvalov.
Qeveria e Ukrainës dhe separatistët pro-rusë më 5 shtator të vitit të kaluar kanë nënshkruar marrëveshje armëpushimi në Minsk, e cila në disa raste është shkelur nga dyja palët.
Të paktën 1.363 persona janë vrarë pas marrëveshjes në Minsk, ndërkohë që nga prilli i vitit të kaluar, kur separatistët pro-rusë morën Lugansk dhe Donjeckun, janë vrarë mbi 4.800 persona.
