Zyrtare: Aliji rinovon kontratën me Dinamon

Mbrojtësi i kombëtares shqiptare, Naser Aliji do të vazhdojë të luajë për Dinamon edhe për dy vitet e ardhshme. Me anë të një njoftimi në rrjetet sociale, klubi kryeqytetas ka zyrtarizuar rinovimin e kontratës me 32-vjeçarin.

“FC Dinamo ka kënaqësinë të njoftojë zyrtarisht rinovimin e kontratës me mbrojtësin Naser Aliji edhe për dy vitet e ardhshme.

Presidenti Adrian Bardhi dhe lojtari kanë arritur marrëveshjen për vazhdimin e bashkëpunimit, duke konfirmuar kështu besimin dhe ambiciet e përbashkëta për të ardhmen.

Me eksperiencën ndërkombëtare, profesionalizmin dhe kontributin e tij në fushë, Aliji është një pikë e rëndësishme e skuadrës dinamovite. Rinovimi i kontratës përfaqëson një hap të rëndësishëm në projektin për të ndërtuar një ekip konkurrues dhe të qëndrueshëm.

I urojmë Naserit shumë suksese me fanellën blu në sfidat tona për arritjen e objektivave të radhës!

Klubi po punon fort dhe së shpejti do të ketë të tjera lëvizje për kompletimin e një skuadre kompetitive”, shkruhet në njoftimin e klubit.