Home / Kosova / ​Vetëvendosje përmbys një kamion me produkte serbe

​Vetëvendosje përmbys një kamion me produkte serbe

Aktivistë të Lëvizjes Vetëvendosje përmbysën mëngjesin e sotëm një kamion me produkte të Serbisë, që shiten në Kosovë.

Ky aksion sipas një komunikate të kësaj lëvizje është përgjigje ndaj aktit siç e quajnë ata kriminal të Republikës së Serbisë, e cila dje i ktheu pas mbi 103.000 libra shqip, duke lënë pa shkollë nxënësit shqiptarë të Preshevës, Medvegjës e Bujanocit.

“16 vjet pas luftës, autorja e masakrave dhe e shkatërrimeve të mëdha në Kosovë, Republika e Serbisë, e kontrollon dhe e shfrytëzon Kosovën ekonomikisht me produktet e saj, pa e njohur atë. Në të njëjtën kohë, Republika e Serbisë vijon të shantazhojë përmes minoritetit serb në Kosovë, duke kërkuar të ndërtojë një shtet brenda shtetit me projektin e “Zajednicës””, thuhet në komunikatën e Lëvizjes Vetëvendosje.

“Këto aksione të Republikës së Serbisë nuk gjejnë përgjigje reciproke nga Republika e Kosovës, udhëheqja e korruptuar e të cilës e ka çuar Kosovën në përulje. Jo vetëm që nuk po mundet qeveria e Kosovës të vendosë regjim reciprociteti tregtar me Serbinë, duke kontrolluar kufijtë e vet, por as nuk po mundet të kujdeset për fëmijët shqiptarë në Serbi, të cilëve nuk ka mbërritur t’ju sigurojë as librat shkollorë, edhe pse ka negociuar dhe vazhdon të negociojë me qeverinë e Serbisë për vite me radhë”, vazhdon më tutje komunikata.

Për këto arsye, Vetëvendosje thotë se aktivistët e saj do të vazhdojnë aksionet deri sa Republika e Serbisë të pranojë reciprocitet me Republikën e Kosovës.

Pabarazia dhe nënshtrimi për Vetëvendosjen janë të papranueshme. “Ata nuk i lejojnë librat tanë, ne nuk do t’i pranojmë prodhimet e tyre”, thuhet më tutje në komunikatë.

Leave a Reply

%d bloggers like this: