15 milionë euro mbështetje për konsumatorët e cenueshëm për subvencionimin e faturave të rrymës

Qeveria e Kosovës do të ndajë 15 milionë euro mbështetje për konsumatorët e cenueshëm për subvencionimin e faturave të energjisë elektrike, sipas njoftimit të Ministrisë për Punë, Familje dhe Vlerat e Luftës Çlirimtare, të cituar nga Klan Kosova.

Sipas njoftimit, programi ka për qëllim mbështetjen e ekonomive familjare nga sistemi i mbrojtjes sociale dhe sigurimin e qasjes së barabartë në energji elektrike.

Bëhet e ditur se në ditët në vazhdim pritet të nënshkruhet edhe vendimi me të cilin do të përcaktohen kushtet dhe kriteret për përfitim, në mënyrë që së shpejti të hapet thirrja për aplikim, raporton Klan Kosova.

Programi fokusohet në mbështetjen financiare përmes subvencionimit të faturave të energjisë elektrike, si një nga mënyrat më të drejtpërdrejta për mbështetjen e konsumatorëve të cenueshëm. Republika e Kosovës ka marrë obligime edhe në kuadër të procesit të integrimit evropian dhe zbatimit të Planit të Rritjes për Ballkanin Perëndimor, i cili parasheh zhvillimin e mekanizmave të qëndrueshëm për identifikimin e konsumatorëve të cenueshëm, sipas njoftimit.