Sulmohet ekipi i emisionit “Kiks” në Ferizaj: dy anëtarë të stafit të lënduar, një person dorëzon kamerën në Polici

Ekipi i emisionit “Kiks” në Klan Kosova është sulmuar fizikisht sot në një lagje të Ferizajt, siç njofton Klan Kosova. Sipas informacioneve të deritanishme, ekipi ka qenë në terren, në lëvizje me automjetin e punës, kur dy automjete të tjera ua kanë bllokuar rrugën.

Së paku tre persona kanë dalë nga këto vetura dhe e kanë sulmuar ekipin fizikisht, ndërsa ua kanë marrë edhe kamerën, raporton Klan Kosova. Të lënduar kanë mbetur dy anëtarë të ekipit, të cilët janë duke u trajtuar në Emergjencën e Ferizajt, ndërsa pjesa tjetër e stafit ka mbetur e traumatizuar.

Vlen të theksohet se ekipi, në momentin e sulmit, nuk ka qenë duke kryer xhirime, por ka qenë në lëvizje me automjet, sipas njoftimit.

Sipas informacioneve të fundit të Klan Kosova, një person i dyshuar është paraqitur në Stacionin Policor në Ferizaj, ku e ka dorëzuar kamerën e “Kiks Kosova”. Ai ka deklaruar se kamerën e ka gjetur, por Policia e ka ndaluar deri në sqarim të rrethanave.