4 burgime përjetë për Dritan Dajtin

Gjykata e Krimeve të Rënda shpalli fajtor dhe dënoi me katër burgime të përjetshme të pandehurin Dritan Dajti, për akuzën e vrasjes së katër oficerëve të policisë në vitin 2009: Kastriot Feskaj, Altin Dizdari, Sajmir Duçkollari dhe Fatos Xhani.

Vendimi u dha pak orë pasi u zhvillua me dyer të mbyllura seanca e mbrojtjes së të pandehurit, ashtu sikundër ka vepruar gjykata javët e fundit.

Ndërkohë që mësohet se për të pandehurin, brenda së njëjtës ditë, gjykata kishte urdhëruar sjelljen e tij forcërisht në gjykatë, duke qenë se ai refuzonte t’i përgjigjej kërkesës së gjykatës për të qenë i pranishëm në seancë dhe për t’u mbrojtur.

Ky ngërç zgjati më pak se tre javë, pasi Prokuroria kërkoi katër dënime të përjetshme për Dritan Dajtin, duke e detyruar trupën gjyqësore që të urdhërojë sjelljen forcërisht të tij në gjykatë.

Dajti u shpall fajtor edhe për armëmbajtje pa leje si edhe për vrasjen e Ledjon Marës në bazë të dëshmive të 22 efektivëve që morën pjesë në aksionin për arrestimin e tij, në Gusht 2009.

Gjyqi “Dajti” ka shënuar rekordin e zjarritjes së një procesi penal, prej katër vitesh, për shkak të argumenteve të paraqitura nga i pandehuri se nuk kishte mundësi financiare të gjente avokat, ndërkohë që avokatët që caktoheshin nga gjykata nuk paraqiteshin.