70-vjetori i Çlirimit, paradë ushtarake në MM, Kodheli: Mirënjohje pa kushte veteranëve

Ministria e Mbrojtjes ka organizuar sot një paradë ushtarake me rastin e 70 vjetorit të Çlirimit të vendit.  Të pranishëm në këtë ceremoni ishin kreu i shtetit, Bujar Nishani, kreu i Kuvendit Ilir Meta, kreu i qeverisë, Edi Rama, përfaqësues të kabinetit qeveritar, veteranë të luftës.

Fjala e rastit është mbajtur nga ministrja e Mbrojtjes, Mimi Kodheli e cila ka e vlerësuar 29 nëntorin si një ditë të shënuar të kurorëzimit të sakrificës së mijëra të rënëve për lirinë  atdheut. Kodheli vlerësoi veteranët e luftës si njerëzit që me luftën dhe sakrificën e tyre pa asnjë kusht ja dolën të përzinin okupatorin nazi-fashisht duke i sjellë lirinë vendit dhe dinjitetin në arenën ndërkombëtare.

“Gjendemi në këtë ditë të paqtë ndërsa 70 vjet më parë qielli i Shqipërisë ishte i mbushur me thirrje gëzimi dhe tym baruti fitimtar. Para nesh është një grup veteranësh të luftës. Njerëz që e panë armikun në sy. Ju e patë vdekjen në sy, por nuk u kthyet pas.

Respekti dhe mirënjohja jonë janë me ju dhe pa kushte. Çlirimtarët tanë kishin besim se ajo që po bënin ishte e drejta. Ka një diferencë morale mes përdorimit të forcës për liri dhe për pushtim. Ata ishin çlirimtarët dhe jo pushtuesit”, tha Kodheli.