A ka lidhje konflikti Doshi- Frroku me vrasjen e Santos?

A ka lidhje konflikti i tanishëm Doshi- Frroku me vrasjen e bankierit Artan Santo?

Këtë aluzion ka bërë në numrin e saj të fundit revista “Java”. Dihet se Artan Santo u vra pak ditë pas sekuestrimit të një anije me afro 10 milion euro drogë që u kap në Mal të Zi dhe që duhej të vinte në Shqipëri. Ndoshta ky është thjeshtë një përkim, por pas këtyre dy ngjarjeve shumë gjëra ndryshuan radikalisht. Në numrin e saj të fundit e përjavshmja informative është përpjekur të zbulojë prapavijën e asaj që ndodh pas konfliktit Doshi- Frroku.

Sipas kësaj reviste, gjithçka lidhet me lokalitetin e vogël të Fushë- Krujës. Sipas burimeve të “Java” mendohet se dy vrasësit e Artan Santos, që gjendeshin në motorrin e zi, janë nga kjo zonë. “Santo ekzekutohet në një atentat tipik mafioz, pikërisht në derën e zyrës së tij nga dy atentatorë që ende nuk kanë emër dhe identitet. Dyshimet më të forta janë se ata janë nga zona e Fushë Krujës, një nga pikat e nxehta të vendit sot”, shkruan Java dhe vazhdon: “Fushë Kruja është pika lidhëse e dy historive të tjera, përveç tritolit. Nga Fushë Kruja është Durim Bami, i akuzuar nga Doshi si njeriu që do të bënte atentatin kundër tij. Po nga ky qytet dhe mik me të është dhe Enver Stafuka, një tjetër personazh i përfshirë në procesin e vrasjes së komisarit Durim Lamaj, në rolin e ndihmësit. Stafuka është marrë peng ditë më parë, po në Fushë Krujë. Po nga Fushë Kruja është nisur drejt Tiranës në 5 janar të këtij viti, kur i kanë bërë një atentat në Qafën e Kasharit, Emiljano Shullazi, një tjetër emër i njohur në kryeqytet. Dje i akuzuar nga socialistët për lidhje me pushtetin e PD-së, sot, së fundmi i akuzuar nga Berisha si i lidhur me PS-në, e konkretisht me ministrin e Brendshëm”.

Pra a duhet kërkuar gjeneza e aferës Doshi- Frroku në Fushë Krujë? Pikërisht andej nga vijnë vrasësit e supozuar të Santos dhe vrasësit imagjinarë të Doshit? Ky është një nga misteret e hetimit.