Ahmetaj: Më 17 shkurt FMN pritet të aprovojë këstet e radhës për Shqipërinë

Ministri Ahmetaj gjatë raportimit në Komisionin e Veprimtarive Prodhuese për programin e reformave ekonomike 2016-2018, theksoi se pritet rritje ekonomike 3.4 % për 2016 dhe mbi 4 % për 2017.

Ahmetaj tregoi edhe se programi 2016-2018 është një dokument i konsoliduar, i cili është hartuar me asistencën e donatorëve.

Ministri theksoi se shtylla kryesore e programit në fjalë është kuadri makroekonomik, që përfshin rritjen ekonomike edhe risqet.

Rritja ekonomike në 2015 pritet të mbyllet 2.75 %, sipas ministrit. Ndërsa, duke shprehur projeksionet për 2016, ai tha se pritet 3.4 përqind dhe në 2017 mbi 4 përqind.

Mirëpo, sipas ministrit, rritja ekonomike ka risqet e brendshme dhe të jashtme.

“ Ne kemi vënë fokusin te ulja e borxhit dhe te deficiti buxhetor. Eksportet janë të konsoliduara”- tha Ahmetaj, teksa tregoi se rënia e eksporteve u ndikua nga konjuktura ndërkombëtare dhe nga rënia e çmimit të naftës.

Ahmetaj raporti edhe se kemi rritje të importit të makinerive, kemi rritje të investimeve të huaja.

Ministri theksoi se me 17 shkurt FMN pritet të aprovojë këstet e radhës për Shqipërinë.

Ndërsa deputetët opozitarë kanë shfaqur kundërshtitë e tyre ndaj programit të prezantuar nga ministri I MZHETTS.
Genc Ruli tha se biznesit i janë bërë mankth procedurat. nuk merr dot një dokument në hipotekë për kredi. “Punonjësit të orientojnë te tregu informal dhe nuk të japin dokumentin e kërkuar.”- tha Ruli.

Duke vijuar me akuza më tej, ai tha se fermat shqiptare nuk kanë marrë asnjë ndihmë, tregu i energjisë është aq i liberalizuar sa e la qeveria Berisha në 2008. “Mos i bëni këto show në syrin tonë. Raporti juaj është si hallva por nuk të çon gjëkundi”- përfundoi Ruli.