AKBN në terren për të verifikuar praninë e gazit në Hidrovorin e Akërnisë

Specialistë të Agjencisë Kombëtare të Burimeve Natyrore (AKBN) mbërritën pasditen e së mërkurës në zonën e Hidrovorit të Akërnisë për të verifikuar praninë e gazit dhe situatën në terren.

Raporton shqiptarja se AKBN nuk ka dhënë asnjë leje për shpime në këtë zonë. Burime lokale bëjnë me dije se karakteristikat kënetore të terrenit dhe shpimet e kryera më parë nga subjektet private gjatë studimeve gjeologjike mund të kenë sjellë çlirime të gazit, por kjo hipotezë duhet të verifikohet me analiza të mëtejshme.

Aktualisht situata është nën vëzhgim dhe specialistët po kryejnë kontrolle për të përcaktuar me saktësi burimin dhe rrezikshmërinë. Një grup pune do të monitorojë zonën edhe në ditët në vijim, ndërsa autoritetet synojnë të marrin masa parandaluese për të mbrojtur banorët dhe mjedisin përreth.

Puna e verifikimit dhe monitorimit do të vazhdojë deri sa të konfirmohet shkaku i pranisë së gazit dhe të vendosen masat e nevojshme, sipas shqiptarja.