Aktivistja shqiptaro-amerikane, Kokalari akuzon konsulentët amerikanë për avancimin e agjendës ruse në Ballkan

Aktivistja konservatore shqiptaro-amerikane, Evi Kokalari, ka ngritur akuza ndaj disa konsulentëve politikë amerikanë, duke pretenduar se angazhimi i tyre në Ballkan po u shërben figurave politike të lidhura me Moskën dhe po rrezikon stabilitetin e rajonit.

Në një postim në rrjetin social X, Kokalari ka përmendur Chris LaCivita, James Blair, Katie Wiles dhe Paul Manafort, duke vënë në pikëpyetje veprimtarinë e tyre politike në Ballkanin Perëndimor dhe lidhjet e tyre me aktorë politikë në rajon.

Ajo ka kundërshtuar deklaratën e një personi nga ekipi i LaCivita-s, të raportuar nga gazetarja Kellie Meyer, sipas së cilës Republika Srpska në Bosnjë e Hercegovinë kundërshton politikën e jashtme tradicionale amerikane, por mbështet konservatorët dhe lëvizjen “America First”.

Sipas Kokalarit, ky përshkrim nuk pasqyron realitetin politik dhe bie ndesh me parimet e konservatorizmit amerikan.

Në postimin e saj, ajo ka pretenduar gjithashtu se lidhjet e figurave të përmendura me rrjetin ndërkombëtar socialist dhe komunist SOVINTERN janë në kundërshtim me vlerat e konservatorëve amerikanë. Kokalari e ka përshkruar këtë rrjet si të themeluar në Moskë në prill të vitit 2026, ndërsa ka përmendur edhe Aleksandar Vulinin dhe Lëvizjen Socialiste të Serbisë, të cilën e ka cilësuar si anëtare themeluese të tij.

“Republikanët dhe konservatorët nuk kanë asgjë të përbashkët me socialistët dhe komunistët”, ka shkruar Kokalari.

Shqetësimet për Dodikun dhe Marrëveshjen e Dejtonit

Një pjesë të kritikave të saj, Kokalari ia ka kushtuar edhe Millorad Dodikut, duke ngritur shqetësime për deklaratat e tij lidhur me rishikimin e Marrëveshjes së Dejtonit, e cila i dha fund luftës në Bosnjë e Hercegovinë.

Ajo i ka lidhur këto zhvillime me rrezikun për paqen dhe stabilitetin në Ballkanin Perëndimor, duke pretenduar se veprimet e aktorëve të caktuar politikë dhe mbështetja që ata marrin mund të avancojnë interesat ruse në rajon.

Megjithatë, akuzat e paraqitura nga Kokalari në postimin e saj duhet të trajtohen si pretendime të saj, për të cilat nevojitet verifikim i pavarur.

Përmend edhe Sali Berishën dhe kompaninë Continental

Në postimin e saj, Kokalari ka përmendur edhe kreun e Partisë Demokratike të Shqipërisë, Sali Berisha, duke ngritur pikëpyetje për mënyrën se si ai dhe një grup përfaqësuesish të kësaj partie kanë marrë pjesë në një aktivitet të republikanëve amerikanë në Teksas.

Sipas pretendimit të saj, me ndihmën e kompanisë Continental, ku ajo thotë se punon Katie Wiles, Berisha kishte siguruar një përjashtim nga kërkesa për vizë dhe kishte marrë pjesë në konventën e Komitetit Kombëtar Republikan, së bashku me dhjetë anëtarë të PD-së.

Kokalari pretendon se fotografitë e realizuara gjatë aktivitetit, ku Berisha shfaqej me përfaqësues republikanë, më pas ishin paraqitur në Shqipëri si dëshmi e mbështetjes nga republikanët dhe administrata amerikane.

Ajo ka ngritur dyshime për një konflikt të mundshëm interesi nga ana e LaCivita-s, duke pretenduar se ai kishte përfshirë klientë të huaj në një aktivitet ku ishte angazhuar si konsulent politik.

Në vijim të këtyre pretendimeve, Kokalari ka kërkuar mundësinë që t’ia paraqesë drejtpërdrejt shqetësimet e saj presidentit amerikan, Donald Trump, në praninë e LaCivita-s.

Kokalari ka theksuar se shqetësimet e saj nuk kufizohen vetëm te aktiviteti i konsulentëve politikë amerikanë, por lidhen edhe me korrupsionin, stabilitetin e Ballkanit Perëndimor dhe të drejtat e qytetarëve në Shqipëri, Serbi dhe Bosnjë e Hercegovinë.